"მე ყოველდღიურად ვცდილობდი მომეძებნა გზები, რათა დავბრუნებულიყავი საქართველოში", - განაცხადა ჟურნალისტებთან ბუტა რობაქიძის მკვლელობის საქმეზე სამსახურეობრივი უფლებამოსილების ბოროტად გამოყენებაში ერთ-ერთმა ბრალდებულმა, ზაზა ბაქრაძემ.
როგორც ის განმარტავს, სასამართლოში მან სწორი ჩვენება მისცა და მზად არის, მის დანაშაულზე პასუხი აგოს.
"როგორც კი საქართველოში დაბრუნების საშუალება მომეცა, მაშინვე დავბრუნდი. ამას ადრეც ვაპირებდი. შეიძლება იცნობდეთ კიდეც, 2013 წელს საინფორმაციო საშუალებებში ჩემს მიერ გაკეთებულ განცხადებას, მე მაშინაც ნაწილობრივ ვაღიარე დანაშაული, მაგრამ ახლა სასამართლოს მივეცი ის ჩვენება,რაც სიმართლეა და ჭეშმარიტია. ახლაც ვაცხადებ, თუ ჩემს ჩვენებაში იქნება რაიმე ისეთი, რაც სიმართლე არ იქნება, მზად ვარ, პასუხი ვაგო",- განაცხადა ბაქრაძემ.
ცნობისთვის, აღნიშნულ საქმეზე 6 პირი: გურამ დონაძე, ზაზა ბაქრაძე, ზურა მიქაძე, ლევან გვაზავა, ირაკლი ფირცხალავა და დავით იაშვილი არიან ბრალდებული.
ერთ-ერთი ბრალდებული, კრიმინალური პოლიციის ყოფილი უფროსი, ზაზა ბაქრაძე, რომელიც თბილისის საერთაშორისო აეროპორტში 28 თებერვალს დააკავეს, 30 მარტს, 5 000 ლარიანი გირაოს სანაცვლოდ სხდომათა დარბაზიდან გაათავისუფლეს.