„დამიჯერეთ, ძალიან ცუდად ვარ, ახლა იმ დონეზე ვარ მისული, ვფიქრობ თავი როდის, ან როგორ მოვიკლა“, - განაცხადა „ჯი-ეიჩ-ენთან“ საუბარში რუსთავში, 15 წლის გოგონას ფიზიკურ ძალადობაში დადანაშაულებულმა დედამ.
როგორც მოზარდის დედა აცხადებს, თუ მისი ბრალეულობა გამოიკვეთება, მზად არის პასუხი აგოს.
„გამოძიებას, ექსპერტიზას დაველოდოთ და ყველაფერი მერე გავარკვიოთ, მეტის თქმა არ შემიძლია, ძალიან ცუდად ვარ. დასაჭერი ვიქნები - დამიჭერენ, ის იქნება დასაჭერი და იმას დაიჭერენ, მეტი არაფერი ვიცი“, - აცხადებს მოზარდის დედა.
არსებული ინფორმაციით, 28 წლის მამაკაცმა 15 წლის გოგონაზე სავარაუდოდ, სექსუალურად იძალადა. დაუზუსტებელი ინფორმაციით, მშობელთან კამათის დროს მოზარდს დედა ფიზიკურად გაუსწორდა, სკოლაში მისულმა გოგონამ თავი შეუძლოდ იგრძნო, რის შემდეგაც ადგილზე სასწრაფო დახმარება გამოიძახეს. სექსუალური ძალადობის შესახებ კი მას შემდეგ გახდა სამართალდამცავებისთვის ცნობილი, რაც სკოლაში საპატრულო პოლიცია გამოიძახეს და გოგონა სპეციალურ დაწესებულებაში გადაიყვანეს.
როგორც „ჯი-ეიჩ-ენთან“ სოციალური მუშაკი, ლელა მაჭავარიანი აცხადებს, მოზარდთან სოციალური მუშაკები და ფსიქოლოგები 24 საათიან რეჟიმში მუშაობენ.
„მოზარდთან მუდმივად მუშაობს სოციალური მუშაკი დ ფსიქოლოგი, ის გარკვეულ ჩვენებებს იძლევა, რასაც ვერ გავახმოვანებთ. ბავშვი ამჟამად სახელმწიფო ზრუნვაში, 24 საათიანი მეთვალყურეობის ქვეშ იმყოფება. ბავშვის მოთხოვნილების გათვალისწინებით უტარდება მკურნალობა, გამოკვლევები და ექიმის რეკომენდაციებია გათვალისწინებული.
რაც შეეხება ოჯახთან მუშაობას, ჯერ არ დაგვიწყია. მშობელს და მის მეგობარ მამაკაცს 30 დღიანი შემაკავებელი ორდერი აქვთ გამოწერილი. შემდეგ ეტაპზე, ბავშვის ინტერესი როგორც გამოიკვეთება და საქმის მსვლელობა როგორც გვიჩვენებს, იმის შესაბამისად მოვიქცევით. ამ ამბავში მთავარი იყო ის, რომ ძალიან დროულად მოხდა შემთხვევის გამოვლენა, სკოლამ მოახდინა დროული რეაგირება“, - აღნიშნავს მაჭავარიანი.
როგორც სოციალური მუშაკი ამბობს, მოზარდს ექსპერტიზა ჩაუტარდა, თუმცა, შედეგები მათთვის ცნობილი არ არის.
„ბავშვს სხვა ექსპერტიზებთან ერთად ფსიქოლოგიური ექსპერტიზაც ჩაუტარდა, რომლის შედეგებიც ჩვენთვის უცნობია. როგორც ვიცი, გარეგნული დაზიანებები არ გამოკვეთილა“, - დასძენს მაჭავარიანი.
შსს-მ ფაქტზე გამოძიება ორი მუხლით დაიწყო - სსკ-ის 126-ე პრიმა მუხლით, რაც ოჯახურ ძალადობას გულისხმობს და 11 პრიმა 141-ე მუხლით, რაც გულისხმობს პასუხისმგებლობას ოჯახურ დანაშაულზე და გარყვნილ ქმედებას.
