მერიის ყოფილი მაღალჩინოსნის, ოთარ აბესაძის ადვოკატის ნონა ფილაურის განცხადებით, ის რომ აბესაძემ მერიის თანამშრომლებთან კონსულტაცია გაიარა, საერთოდ არ მიანიშნებს იმაზე, რომ ის დანაშაულის ჩადენას გეგმავდა.
„ქრთამის აღება ნიშნავს რაღაც კონკრეტული სამსახურის გაწევას ფულის სანაცვლოდ. დღეს დაკითხული სამი მოწმის მიმართ ოთარ აბესაძეს რაიმე სახის თხოვნა არ ჰქონია. ეს იყო მათთან მხოლოდ და მხოლოდ კონსულტაცია. მხოლოდ დაინტერესებისთვის ადამიანები არ ისჯებიან. ვიმეორებ, ოთარ აბესაძემ მეგობართან ერთად მერიის მაღალჩინოსნებთან, კონსულტაცია გაიარა, თუ რა სამსახურებიდან სჭირდებოდა მას ნებართვის აღება. ამ ყველაფრიდან ის დავინახე რომ ოთარ აბესაძე ბევრ რამეში ვერ ერკვეოდა, ბევრ რამეში ვერ ერკვეოდა მისი მეგობარიც, რომელსაც ეს ნებართვა საჭირდებოდა. აქედან გამომდინარე აბესაძემ რამდენიმე კონსულტაცია გაიარა. მოწმეებმა ცალსახად დაადასტურეს, რომ არცერთის მიმართ ოთარ აბესაძის მხრიდან კონკრეტულ თხოვნას ამ საკითხთან დაკავშირებით ადგილი არ ჰქონია. რაიმით დაინტერესება დანაშაულის ჩადენას არ ნიშნავს. ოთარ აბესაძემ ისიც კი არ იცოდა ნებართვებს ვინ გასცემდა და რომელი სამსახური იყო ამისთვის საჭირო.
პროკურორის თქმით, ოთარ აბესაძის დანაშაული დღესაც დადასტურდა, რაც ასე ნამდვილად არ არის. მოდი დავიცადოთ, გამოაქვეყნონ ის აუდიო-ვიდეო ჩანაწერები და ყველაფერში კიდევ ერთხელ დავრწმუნდებით. თუ იმასაც ისე ამტკიცებს ბატონი პროკურორი, რასაც დღევანდელი მოწმეების ჩვენებების შესახებ ამბობს, გამოდის, რომ ბრალდებას სასამრთლოს შეცდომაში შეყავს. ვიმეორებ, კონკრეტული მოთხოვნა კონკრეტულ საქმესთან დაკავშირებით, ოთარ აბესაძის მხრიდან მერიის არცერთი მაღალჩინოსნის მიმართ არ გაჟღერებულა“ - განაცხადა ნონა ფილაურმა.
შეგახსენებთ, მერიის ყოფილი თანამშრომელი ოთარ აბესაძე ქრთამის აღების ბრალდებით სუს-მა დააკავა. გამოძიების თანახმად, აბესაძემ მდინარე მტკვარზე, გარკვეული კონსტრუქციის აშენებისთვის საჭირო ნებართვის მისაღებად და ნებართვის მიღებამდე მშენებლობის წარმოების მფარველობის სანაცვლოდ მოქალაქეს 3 ათასი დოლარი ქრთამის სახით გამოართვა.
