გვინდა, რომ არჩილ ტატუნაშვილთან დაკავშირებით პარლამენტმა ერთი რეზოლუცია მიიღოს, - ამის შესახებ „ევროპული საქართველოს“ წევრმა სერგი კაპანაძემ განაცხადა.
მისი თქმით, "ევროპული საქართველო" სთავაზობს პარლამენტს, შემუშავებული იყოს კონკრეტული ინსტრუმენტი, რომელსაც მომავალში ექნება პრევენციული ხასიათი.
“მთავარი არსი რეზოლუციციისა, რომელიც “ევროპულმა საქართველომ“ პარლამენტს წარუდგინა, მდგომარეობს იმაში, რომ ერთი მხრივ, იყოს დაგმობილი ის ქმედებები, რომლებიც ბოლო პერიოდში ხდება ოკუპირებულ ტერიტორიებზე. კონკრეტულად ეს არის სიცოცხლის ხელყოფა ჩვენი მოქალაქის, მანამდე ანალოგიური ქმედება იყო გიგა ოთხოზორიასთან მიმართებაში, დაგმობილი უნდა იყოს ადამიანების გატაცებები და ა.შ. მეორე მხრივ, ჩვენ ვთავაზობთ პარლამენტს, რომ შემუშავებული იყოს კონკრეტული ინსტრუმენტი, რომელსაც მომავალში ექნება პრევენციული ხასიათი. ანუ ჩვენი იდეა არის, რომ ეს სია შექმნას საქართველოს მთავრობამ და ამ სიაში მოახვედროს ეჭვმიტანილები. მიგვაჩნია, რომ ასეთი ტიპის სანქციები, რომელიც უნდა იყოს ამ ადამიანების მიმართ განხორციელებული, უნდა მოიცავდეს ერთი მხრივ, სავიზო შეზღუდვებს ჩვენი პარტნიორების მხრიდან, ფინანსურ ტრანზაქციებზე შეზღუდვებს და ასევე მიგვაჩნია, რომ ის პოლიტიკა, რომელსაც საქართველოს ეს და წინა ხელისუფლება ატარებდა ჯანდაცვის ხელმისაწვდომობასთან დაკავშირებით შეთავაზებების სახით, ოკუპირებულ ტერიტიტორიებზე მცხოვრები ადამიანებისთვის, ასეთი ტიპის ადამიანებზე არ გავრცელდეს. ეს არის მოკლე ფაბულა იმ რეზოლუციის რომელსაც გთავაზობთ. ძალიან დიდი იმედი გვაქვს და გვინდა, რომ პარლამენტმა მიიღოს ერთი რეზოლუცია, რომელშიც ყველა ეს იდეა იქნება ასახული“, - განაცხადა სერგი კაპანაძემ.
ცნობისთვის, „ევროპული საქართველო“ ე.წ მაგნიცკის სიის ანალოგის, ოთხოზორია-ტატუნაშვილის სიის შექმნას ითხოვს.
