„ჩვენი გათავისუფლება შემიძლია გითხრათ, რომ მულოდნელი იყო. რატომღაც, იმედი აღარ გვქონდა რომ გაგვათავისუფლებდნენ. პრეზიდენტმა არ შეგვიწყვალა, შესაბამისად, დღევანდელი გათავისუფლების იმედიც არ გვქონდა. ოთხი არასრულწლოვანი შვილი მყავს და ჩემი მდგომარეობა გაითვალისწინეს“, - განუცხადა „ჯი-ეიჩ-ენს“ სასამართლო დარბაზიდან გათავისუფლებულმა მერაბ ღოღობერიძემ.
როგორც ღოღობერიძე განმარტავს, ის თავის ადვოკატთან ერთად სამართლებრივ ბრძოლას განაგრძობს.
„ჩვენ ნაწილობრივ დავამტკიცეთ, რომ არანაირ ჯგუფურ ორგანიზებასთან არანაირი კავშირი მქონია. ჩემს ადვოკატთან ერთად აუცილებლად განვაგრძობ სამართლებრივ ბრძოლას. აქვე, დიდი მადლობა ჩემს ადვოკატს, პაატა შავაძეს და ჟურნალისტებს. დიდი მადლობა, რომ ასეთი აქტიურები იყავით“, - აცხადებს ღოღობერიძე.
როგორც „ჯი-ეიჩ-ენთან“ საუბარში ის აღნიშნავს, პოლიტიკური პარტიის ჩამოყალიბებას გეგმავს.
„პოლიტიკურ პარტიას - „ძლიერ რეგიონს“ ჩამოვაყალიბეთ და ჩვენს სათქმელს აუცილებლად ვიტყვით. აჭარაში პრობლემებია და ამაზე სამწუხაროდ არავინ საუბრობს, პრემიერ-მინისტრს არ ეუბნებიან სიმართლეს, თუ რა პრობლემებია აჭარაში“, - აცხადებს ღოღობერიძე.
ცნობისთვის, ბათუმის მოვლენებზე მსჯავრდებულები, ირაკლი ჩხვირკია და მერაბ ღოღობერიძე ბათუმის საქალაქო სასამართლომ დღეს გაათავისუფლა. ბრალდებულების ვადაზე ადრე გათავისუფლების გადაწყვეტილება პირობით ვადაზე ადრე გათავისუფლების კომისიამ მიიღო.
ირაკლი ჩხვირკიას და მერაბ ღორღობერიძეს თავისუფლების აღკვეთა 1 წლითა და 6 თვით ჰქონდათ მისჯილი. აღნიშნული, პროკურატურამაც და დაცვის მხარემაც სააპელაციო სასამართლოში გაასაჩივრა. სასამართლო პროცესები კვლავ გაგრძელდება, დაცვის მხარეს გამამართლებელი განაჩენის მოლოდინი აქვს.