ჩვენ პრესის კომუნიკეშიც მოვუწოდეთ დე ფაქტო ხელისუფლების წარმომადგენლებს, რომ ნათელი მოჰფინონ იმ გარემოებებს, რომელმაც გამოიწვია ტატუნაშვილის გარდაცვალება და ასევე მოვუწოდეთ, რომ გაეთავისუფლებინათ ის ორი ქართველი, რომელიც ამჯერად იმყოფება ე.წ სამხრეთ ოსეთის ტერიტორიაზე, – ამის შესახებ ჟურნალისტებს საქართველოში საფრანგეთის ელჩმა პასკალ მენიემ განუცხადა.
მან გარდაცვლილი ტატუნაშვილის ოჯახს კიდევ ერთხელ მიუსამძიმრა.
„პირველივე დღეებში შევიტყეთ ამის შესახებ და დამწუხრებული ვართ ამ ფაქტით. ჩვენ, რა თქმა უნდა, კიდევ ერთხელ ვუსამძიმრებთ ტატუნაშვილის ოჯახის წევრებს მისი გარდაცვალების გამო. ჩვენ პრესის კომუნიკეშიც მოვუწოდეთ დე ფაქტო ხელისუფლების წარმომადგენლებს, რომ ნათელი მოჰფინონ იმ გარემოებებს, რომელმაც გამოიწვია ტატუნაშვილის გარდაცვალება და ასევე მოვუწოდეთ, რომ გაეთავისუფლებინათ ის ორი ქართველი, რომელიც ამჯერად იმყოფება ე.წ სამხრეთ ოსეთის ტერიტორიაზე. ჩვენ, რა თქმა უნდა, ნდობას ვუცხადებთ იმ ქმედებებსა და ღონისძიებებს, რომელსაც ატარებს სადამკვირვებლო მისია საქართველოს ტერიტორიაზე და რომელიც საჭირო საქმიანობას ახორციელებს ჩვენს ტერიტორიასა და საოკუპაციო ხაზთან. კომუნიკეში ჩვენ კიდევ ერთხელ დავადასტურეთ საქართველოს ტერიტორიული მთლიანობისა და სუვერენიტეტის მხარდაჭერა“, – განაცხადა პასკალ მენიემ.
შეგახსენებთ, 22 თებერვალს, საოკუპაციო რეჟიმმა საქართველოს მოქალაქეები - არჩილ ტატუნაშვილი, ლევან ქუტაშვილი და იოსებ პავლიაშვილი ახალგორში დააკავა. 23 თებერვალს კი გავრცელდა ინფორმაცია, რომ არჩილ ტატუნაშვილი გაურკვეველ ვითარებაში გარდაიცვალა.
ცნობისთვის, ფრაქცია „ქართული ოცნების“ თავმჯდომარე მამუკა მდინარაძის განცხადებით, ის არ გამორიცხავს, რომ ტატუნაშვილის საქმეზე ოპოზიცია და მმართველი გუნდი საერთო დოკუმენტზე შეჯერდნენ.
ერთ-ერთი ვერსიით, ტატუნაშვილის გარდაცვალებასთან კავშირი ახალგორის ადმინისტრაციის უფროსს, ფილიპ ხაჩიროვს აქვს, თუმცა მან ეს ინფორმაცია უარყო.
ამავე საკითხზე, „ევროპული საქართველო“ ე.წ მაგნიცკის სიის ანალოგის, ოთხოზორია-ტატუნაშვილის სიის შექმნას ითხოვს.