"ევროპული საქართველოს" ერთ-ერთის ლიდერის, გიგა ბოკერიას განცხადებით, "ევროპული საქართველო" წელიწადნახევარია ითხოვს მინისტრების პარლამენტში მისვლას და უმცირესობასთან შეხვედრის ფორმატში კითხვებზე პასუხების გაცემას, თუმცა მინისტრები კანონის დარღვევას არ ერიდებიან და მოთხოვნას ხშირად წერილობითაც კი არ პასუხობენ.
ბოკერიას თქმით, ეს არ არის "ევროპული საქართველოს" პრობლემა, ეს მთელი ქვეყნის პრობლემაა, რომელიც ავლენს "ქართული ოცნების" დამოკიდებულებას კანონების მიმართ.
„დღევანდელი კანონმდებლობით ყველა მინისტრს მკაფიო ვალდებულება აქვს, ფრაქციის მოთხოვნის შემთხვევაში, პარლამენტში მოვიდეს და დისკუსიაში მიიღოს მონაწილეობა. მინისტრები ამ კანონის იგნორირებას ახდენენ. ავიწყდებათ რომ ეს მათი ვალდებულებაა საზოგადოების წინაშე. დღესაც ველით ორი მინისტრის მოსვლას, თუმცა არც საგარეო საქმეთა და არც ფინანსთა სამინისტროებიდან პასუხი არაა როდის შეძლებენ სტუმრობას. ეს არაა "ევროპული საქართველოს" პრობლემა, ეს მთელი ქვეყნის პრობლემაა, რომელიც ავლენს "ქართული ოცნების" დამოკიდებულებას კანონების მიმართ. ისინი ასე უყურებენ საკითხს - მოვიგეთ არჩევნები, რასაც გვინდა იმას ვიზამთ“, - განაცხადა ბოკერიამ.
