"ევროპულმა საქართველომ" ოთხოზორია-ტატუნაშვილის სიის შექმნაზე, "ქართული ოცნების" უმრავლესობასთან კონსულტაციების პირველი ეტაპი გამართა.
თუ საპარლამენტო უმრავლესობის რეზოლუციის ფარგლებში ოთხოზორია-ტატუნაშვილის სია შეიქმნება და დამნაშავეებზე სანქციები გავრცელდება, "ევროპული საქართველო" მზადაა ამ რეზოლუციას მხარი დაუჭიროს. ამის შესახებ ევროპული საქართველოს პარტიის თავმჯდომარემ და საპარლამენტო უმცირესობის ლიდერმა დავით ბაქრაძემ განაცხადა.
„ჩვენი ამოცანაა რომ არჩილ ტატუნაშვილის ტრაგედიამ გაგვაერთიანოს და პარლამენტმა შეძლოს ერთი ძლიერი, სახელმწიფოებრივი რეზოლუციის მიღება. ამისთვის ჩვენ მზად ვართ ყველა ნაბიჯის გადასადგმელად. ჩვენ გვქონდა პირველი რაუნდი კონსულტაციის უმრავლესობასთან და ვფიქრობ, რომ მათი მხრიდან განწყობაც შესაბამისია და სავარაუდოდ მოვახერხებთ ერთიან დოკუმენტზე შეჯერებას. ეს კონსულტაციები გაგრძელდება დღესაც და მომავალი დღეების განმავლობაში. ამ კონსულტაციაზე ჩვენ მზად ვართ ვისაუბროთ სხვა საპარლამენტო ოპოზიციურ პარტიებთანაც, ვინაიდან ეს შემთხვევა, ტატუნაშვილის მკვლელობა და ზოგადად ოკუპირებულ ტერიტორიაზე მიმდინარე პროცესები არ გახლავთ პარტიული თემა. ეს არის ის თემა, რომელსაც ქართულმა სახელმწიფომ უნდა გასცეს ღირსეული პასუხი“, - განაცხადა ჟურნალისტებთან დავით ბაქრაძემ.
შეგახსენებთ, ამ დროისთვის პარლამენტში ორი რეზოლუციაა დარეგისტრირებული. ერთის ავტორი "ევროპული საქართველოა" და ის ოთხოზორია-ტატუნაშვილის სიის შექმნას, ამ სიაში კი იმ ბრალდებულების შეყვანას ითვალისწინებს, რომლებმაც მონაწილეობა მიიღეს საქართველოს მოქალაქეების გატაცებაში, წამებასა და მკვლელობაში. "ევროპული საქართველოს" ინიციატივით ამ ადამიანებს საერთაშორისო სანქციები უნდა შეეხოთ.
პარლამენტში დარეგისტრირებულია ხელისუფლების რეზოლუციის პროექტიც, რომელიც ჯერჯერობით არ ითვალისწინებს კონკრეტული დამნაშავეების გამოვლენასა და მათზე სანქციების გავრცელებას.
