ბარათაშვილის ქუჩაზე დაშავებულ დანარჩენ ბავშვებს უტარდებათ ყველა საჭირო ღონისძიება, მათი მდგომარეობა სტაბილურია, – ამის შესახებ პარლამენტის ჯანდაცვის კომიტეტის თავმჯდომარე აკაკი ზოიძემ განაცხადა.
„როგორც ინგოროყვას კლინიკაში, ისე „ამტელ ჰოსპიტალში“ თითოეული მოსწავლის მდგომარეობა არის სტაბილური და მათ სიცოცხლეს ამჟამად საფრთხე არ ემუქრება“, – აღნიშნა ზოიძემ, რომელმაც აქვე გარდაცვლილი მოზარდის ოჯახს მიუსამძიმრა.
შეგახსენებთ, თბილისში, ბარათაშვილის ქუჩაზე "საქართველოს სახელმწიფო ელექტროსისტემის" შენობიდან შუშა ჩამოვარდა.
შუშა გამვლელებს დაეცა, მათ შორის 6 ბავშვს, რომლებიც ტერიტორიაზე მასწავლებელთან ერთად იმყოფებოდნენ. დაშავებულებიდან ერთ-ერთი მოზარდი საავადმყოფოში გარდაიცვალა.
შსს-ს ინფორმაციით, მომხდარზე გამოძიება სსკ-ის 124-ე მუხლით მიმდინარეობს, რაც გაუფრთხილებლობით ჯანმრთელობის ნაკლებად მძიმე ან მძიმე დაზიანებას გულისხმობს.