მეშვიდე დღეა რაც დავით როსტომაშვილის თავდასხმის საქმეზე ერთ ერთი ბრალდებული ბექა კირვალიძე შიმშილობს. ამის შესახებ „ჯი-ეიჩ-ენ“-ს კირვალიძის დედამ, ლია ბეჟაშვილმა განუცხადა.
„ჩემი შვილი შიმშილობს, რათა გაირკვეს და დამტკიცდეს მისი სრული სიმართლე. როსტომაშვილის მიმართ ყაჩაღობას ადგილი არ ჰქონია. იყო მხოლოდ ცემის ფაქტი. შესაბამისად, ჩვენ მუხლის შეცვლას ვითხოვთ.
უნდა დადგინდეს სიმართლე და გაირკვეს, რომ ეს ორი უდანაშაულო ბიჭი შემთხვევის ადგილზე არ ყოფილან. მისი ჯანმრთელობის შესახებ არაფერი ვიცი. მეშვიდე დღეა მშრალ შიმშილზეა. შესაბამისად კარგად არ იქნება“ - აცხადებს ლია ბეჟაშვილი.
შეგახსენებთ, რომ დავით როსტომაშვილზე თავდასხმის საქმეზე სამი პირია ბრალდებული - ბექა კირვალიძე, ზურაბ ქუთელია და არტემ აგაჯამოვი.
ბექა კირვალიძეს ბრალი წარდენილი აქვს 179-ე მუხლის მე-2 ნაწილის "ბ" და მე-3 ნაწილის "ა" ქვეპუნქტებით, 238-ე პრიმა მუხლის მეორე ნაწილით და 379-ე მუხლის პირველი ნაწილით, რაც ითვალისწინებს თავისუფლების აღკვეთას 8-დან 12 წლამდე. არტემ აგაჯანოვს ბრალი წარდგენილი აქვს 25-179-ე მუხლის მეორე ნაწილის "ბ" ქვეპუნქტით, რაც ითვალისწინებს 6-დან 9 წლამდე თავისუფლების აღკვეთას. ზურაბ ქუთელიას კი ბრალი წარდგენილი აქვა 179-ე მუხლის მეორე ნაწილის "ბ" ქვეპუნქტით, რაც ითვალისწინებს 6-დან 9 წლამდე თავისუფლების აღკვეთას.
