გარემოს დაცვის და სოფლის მეურნეობის მინისტრმა ლევან დავითაშვილმა ჟურნალისტის კითხვას იმის შესახებ, თუ რა პოზიცია აქვს მინისტრს უცხოელებზე მიწების მიყიდვის შესახებ კანონში ცვლილებებზე, განაცხადა, რომ ტოტალურ აკრძალვაზე საუბარი არასდროს ყოფილა.
მისი თქმით, ეს საკითხი ორგანული კანონით უნდა დარეგულირდეს და კონსტიტუციის ძალაში შესვლის შემდეგ ამოქმედდეს.
ლევან დავითაშვილის თქმით, ცვლილებები, სავარაუდოდ, წლის ბოლოსთვის იქნება მზად.
"ჩვენი პოზიცია გაგვაჩნია, სამინისტროს, მაგრამ მიმდინარეობს სამუშაო პროცესი. ჩვენი პოზიციაა და ვამბობთ, რომ სასოფლო-სამეურნეო მიწას პასუხისმგებლობით უნდა მოვეპყროთ, უნდა არსებობდეს რეგულაციები, შეზღუდვები და რეგულაციები ძალიან მნიშვნელოვანია. თუმცა ტოტალურ აკრძალვაზე არასდროს გვისაუბრია, უნდა არსებობდეს გარკვეული სივრცე ინვესტიციების განხორციელების, მათ შორის სტრატეგიული პროექტების შემთხვევაში. შეიძლება მთავრობას ჰქონდეს ამის დისკრეცია. კონკრეტულად დეტალები გაშლილი იქნება კანონში", - განაცხადა ლევან დავითაშვილმა.
2017 წლის 15 ივნისს, საქართველოს პარლამენტმა მორატორიუმი მიიღო და კონსტიტუციაში დაგეგმილი ცვლილებების ძალაში შესვლამდე უცხოელებზე მიწის გასხვისება აკრძალა, იმ დათქმით, რომ გარდამავალ ეტაპზე რეგულაცია ბანკებსა და მიკროსაფინანსო ორგანიზაციებზე არ გავრცელდება, ასევე, საქართველოს მთავრობა დისკრეციის უფლებით ისარგებლებს და ზოგიერთ შემთხვევაში, მორატორიუმის მიუხედავად, გადაწყვეტილებას თავად მიიღებს.