„გვინდოდა, თსუ-ის 100 წლის იუბილესთან დაკავშირებულ ღონისძიებაზე გვესაუბრა პრობლემებზე, რომლებიც უნივერსიტეტში და ასევე, ქვეყანაში არის, თუმცა არ დაგვიშვეს“, - ამის შესახებ „აუდიტორია 115-ის“ წევრმა, ნათია ქარჩილაძემ „ჯი-ეიჩ-ენს“ განუცხადა.
როგორც ნათია ქარჩილაძე აღნიშნავს, პიროვნებამ, რომელიც შესასვლელ კართან იდგა "აუდიტორია 115-ის“ წევრებს GPA-ის წარმოდგენა მოსთხოვათ, თუმცა მათი აკადემიური მოსწრების ნახვის შემდეგ გაიქცა.
„დაცვის კორიდორი დაგვახვედრეს და არ გვიშვებდნენ, როცა მოვითხოვეთ, რომ მოსულიყვნენ და განემარტათ, რა იყო ჩვენი არდაშვების მიზეზი, პასუხისმგებელ პირთაგან არავინ მოსულა. ვფიქრობთ, ყველასთვის ღია უნდა იყოს ეს შეხვედრა, აკადემიური მოსწრება არ უნდა ითვლებოდეს ღონისძიებაზე არდასწრების მიზეზად, თუმცა თუ ამაზე მიდგა საქმე, "აუდიტორია 115-ის“ წევრების უმრავლესობას მაღალი GPA გვაქვს. კართან მდგომმა პირმა გვითხრა, რომ წარმოგვედგინა GPA და როცა მე მას წარვუდგინე ჩემი GPA, გაიქცა. გვინდოდა შეხვედრაზე განსხვავებული აზრი გაგვეჟღერებინა და გვესაუბრა იმ პრობლემებზე, რომლებიც უნივერსიტეტსა და ქვეყანაში არის, ახლა უნივერსიტეტში პატრულიც არის მობილიზებული. ჩვენ აქ ვრჩებით და ველოდებით მოვლენების განვითარებას, რადგან კვლავ გვინდა, ჩვენი აზრი გავაჟღწეროთ ამ შეხვედრაზე“, - განმარტა ქარჩილაძემ.
აღსანიშნავია, რომ გუშინ, 7 თებერვალს, მოძრაობის წევრებმა შემდეგი განცხადება გაავრცელეს:
„უნივერსიტეტის ასი წლის იუბილეზე, ამ ღირსშესანიშნავ დღეს, ქვეყნის ელიტარულმა კლასმა მოსპო ის თანასწორობის იდეა, რომელსაც თავის დროზე უნივერსიტეტი დაეფუძნა. უნივერსიტეტის 100 წლისთავისადმი მიძღვნილი მთავარი ღონისძიება ჩაივლის სტუდენტების, ლექტორების, ადმინისტრაციის წევრების, კურსdამთავრებულების, იმ ადამიანების ძირითადი ნაწილის გარეშე, ვისთვისაც უნივერსიტეტი ასე მნიშვნელოვანია. სამაგიეროდ, სავსე იქნება მთავრობის და პარლამენტის წევრებით, მერით, სხვა მაღალჩინოსნებით და მათი დაცვის წევრებით. ირონიულია, რომ საუნივერსიტეტო საზოგადოებისთვის დახურულ ღონისძიებაზე მთელი მსოფლიოდან ჩამოსულ სტუმრებთან ადგილობრივი პოლიტიკური და ეკონომიკური ელიტის წარმომადგენლები ისაუბრებენ ჯავახიშვილის დანატოვარ ღირებულებებზე - თავისუფლებასა და თანასწორობის საუნივერსიტეტო იდეალებზე - და იმაზე, თუ რა მნიშვნელოვანია მათი პირნათლად შესრულება.
ეს ყველაფერი გვაგონებს სააკაშვილის მთავრობის იმ ნაცნობი პრაქტიკის გაგრძელებას, რომელიც დახურულ საუნივერსიტეტო შეხვედრებზე ნეოკომკავშირულ, რეჟიმისადმი ლოიალურად განწყობილ თვითმმართველობის ჯგუფებს დაატარებდა და ამგვარად გაურბოდა კრიტიკული აზრის მოსმენას. ეს ყველაფერი, დაახლოებით იმ შენობების რესტავრირებული გარე ფასადის გახსნის საზეიმო ცერემონიალს გავს, რომლის უკანა მხარე დანგრეული რჩებოდა. ჩვენ ყველა ამ დანგრეულ ნაწილში ვართ, ჩვენი სისტემით, ყოველდღიურობით, ლექციებით, მაღლივით, სტუდენტური საცხოვრებლით, სტატუსშეჩერებული სტუდენტებით, ადამიანებით, რომლებსაც სწავლის გადასახადის დასაფარად ხშირად დღე-ღამის გასწორება უწევთ. დანგრეულ ნაწილში ვართ არამხოლოდ უნივერსიტეტის, არამედ ქვეყნისაც - დაღუპული მუშებით, ბანკის ვალებით, არსებული ნარკოპოლიტიკით, ჩაგვრით, უთანასწორობით, შიმშილით, სიღარიბით.
თავისუფლება! თანასწორობა! სოლიდარობა”, - ნათქვამია „აუდიტორია 115-ის“ განცხადებაში.
შეგახსენებთ, "აუდიტორია 115-ის“ წევრებს თსუ-ის 100 წლის იუბილესთან დაკავშირებულ ღონისძიებაზე არ უშვებენ. ორგანიზაციის წევრებმა აღნიშნული ფაქტი თბილისის სახელმწიფო უნივერსიტეტში მისულ პრემიერმინისტრთან გააპროტესტეს.
თსუ-ში გიორგი კვირიკაშვილს შეძახილებით შეხვდნენ. "აუდიტორია 115-ის“ წევრებს აინტერესებთ, რატომ არ უშვებენ მათ ღონისძიებაზე დასასწრებად.
თსუ-ის პირველ კორპუსში, სადაც საიუბილეო ღონისძიება იმართება და მთავრობის წევრები იმყოფებიან, უსაფრთხოების ზომები გამკაცრებულია.
