დოდო გუგეშაშვილს ჰემორაგიული შოკი ჰქონდა და სუნთქვის უკმარისობა, ეს სიცოცხლისთვის საფრთხის შემცველი მდგომარეობაა, - ამის შესახებ ღუდუშაურის კლინიკის კრიტიკული დეპარტამენტის ხელმძღვანელმა ნიკოლოზ ქარცივაძემ ჟურნალისტებს განუცხადა.
მისი თქმით, გუგეშაშვილის მდგომარეობას შეიძლება დაერქვას სტაბილურად მძიმე.
„სასწრაფო დახმარების ბრიგადის მიერ შემოყვანილია პაციენტი გულ-მკერდის მარცხენა ნახევარში ცეცხლსასროლი იარაღით მიყენებული გამჭოლი ჭრილობით. ჰქონდა ჰემორაგიული შოკი და სუნთქვის მწვავე უკმარისობა. აყვანილია საოპერაციო ბლოკში და ახლა მიმდინარეობს ოპერაცია. ძირითადი ეტაპები, ფაქტობრივად, დასრულებისკენ არის. შემდეგ მკურნალობა გაგრძელდება კრიტიკული მედიცინის დეპარტამენტში. მძიმე იყო მისი მდგომარეობა. ჰემორაგიული შოკი ჰქონდა და სუნთქვის უკმარისობა. ეს სიცოცხლისთვის საფრთხის შემცველი მდგომარეობაა“, - განაცხადა ექიმმა.
ცნობისთვის, დოდო გუგეშაშვილი და მისი შვილი საკუთარ სახლში დაჭრეს. გუგეშაშვილი კლინიკაშია გადაყვანილი, შვილი კი, ადგილზე დაიღუპა.