„მთავრობას ვურჩევდი, NDI-ის კვლევის შედეგებს მიაქციოს ყურადღება, რადგან ასეთი კვლევები არის თერმომეტრი, ქვეყანაში არსებული მდგომარეობისა“, - ამის შესახებ „ერთიანი ნაციონალური მოძრაობის“ წევრმა, მარიამ გერსამიამ „ჯი-ეიჩ-ენს“ განუცხადა.
მისივე განცხადებით, ენმ კვლევის შედეგების შესახებ ერთიანი პოზიციის დაფიქსირებასაც გეგმავს.
„მთავრობას ვურჩევდი, NDI-ის კვლევის შედეგებს მიაქციოს ყურადღება, გამოკითხულთა 39% თვლის, რომ საქართველო არასწორი მიმართულებით ვითარდება, ხოლო მათი რაოდენობა, ვინც ფიქრობს, რომ ქვეყანა სწორი კურსით მიდის, იკლებს. მოსახლეობა აფიქსირებს პოზიციას, რომ გაზრდილია უმუშევრობა, ინფლაცია, კრიმინალი.. მთავრობის მოვალეობა სწორედ ის არის, რომ მსგავს მაჩვენებლებს დაუკვირდეს, რადგან ასეთი კვლევები, პირველ რიგში, არის თერმომეტრი, საზომი ქვეყანაში არსებული მდგომარეობისა, რაც, ცხადია, მან უნდა გაითვალისწინოს, ვისაც შეუძლია, რაიმე ზემოქმედება მოახდინოს და რა თქმა უნდა, ოპოზიციამაც უდნა შეისწავლოს ეს შედეგები, ჩვენ ამაზე პარტიაშიც დავაფიქსირებთ პოზიციას“, - განაცხადა გერსამიამ.
რაც შეეხება გამოკითხულთა 53%-ის აზრს, რომ რუსული პროპაგანდა ქართულენოვანი სატელევიზიო არხებით ვრცელდება, მარიამ გერსამია აღნიშნავს, რომ ეს რუსული ჰიბრიდული ომის ნაწილია.
„ რუსული პროპაგანდა არის ერთ-ერთი მიზეზი, რის შედეგადაც იქმნება გარკვეული წარმოდგენები, განსაკუთრებით ეთნიკური უმცირესობებით დასახლებულ რეგიონებში, სადაც მედიის გავლენა კიდევ უფრო მაღალია, რადგან მოსახლეობა უფრო ხშირად არაქართულენოვან ინფორმაციას ეცნობა. მედია, დიდწილად, ქმნის საზოგადოებრივ დღის წესრიგს, ევროპაც და ამერიკაც საუბრობენ ამ საფრთხეებზე და მიუხედავად იმისა, რომ უკვე დაგვიანებულია, საქართველოც დროა, დაფიქრდეს, ხომ არ ზიანდება სახელმწიფოებრივი ინტერესები რუსული პროპაგანდით“, - განმარტა გერსამიამ და დასძინა, რომ ნებისმიერ კვლევას შეიძლება ჰქონდეს მცირედი ცდომილება, მითუმეტეს საქართველოში, სადაც საკვლევ ველს ახასიათებს დიდი თავისებურებები, რაც ძირითადად უკავშირდება იმას, რომ მოსახლეობა რეგისტრირებულია სხვადასხვა რეგიონებში, თუმცა რეალურად, ცხოვრობს ან დედაქალაქში ან სხვა დიდ ქალაქებში.
შეგახსენებთ, ეროვნულ-დემოკრატიულმა ინსტიტუტმა (NDI) და CRRC–საქართველომ მედიას 2017 წლის დეკემბერში ჩატარებული საზოგადოებრივი აზრის კვლევის შედეგების პირველი ნაწილი წარუდგინა.
NDI-ის კვლევის საველე სამუშაოები ჩატარდა 29 ნოემბერი-19 დეკემბრის პერიოდში, საქართველოს მასშტაბით (ოკუპირებული ტერიტორიების გამოკლებით), 2,298 პირისპირ ინტერვიუს წარმომადგენლობითი შერჩევის საფუძველზე, ცდომილების ზღვარია +/-1.9%.
შედეგების მეორე ნაწილის პრეზენტაცია ხუთშაბათს, 18 იანვარს გაიმართება.
NDI-ის კვლევები დიდი ბრიტანეთის მთავრობის UK aid-ის ფინანსური ხელშეწყობითCRRC-საქართველომ ჩაატარა.
