„ყოველთვის ვაფიქსირებდი იმას, რომ პაციენტის მდგომარეობა უკიდურესად მძიმე იყო. გუშინ, დღის მეორენახევარში გარკვეული უარყოფითი დინამიკა გამოიხატა, თუმცა, ნაწილობრივი სტაბილიზაცია მაინც იქნა მიღწეული“, - განუცხადა „ჯი-ეიჩ-ენს“ წმინდა მიქაელ მთავარანგელოზის სახელობის მრავალპროფილიანი კლინიკური საავადმყოფოს მენეჯერმა, ზაზა ლურსმანაშვილმა.
ექიმის განმარტებით, მაჩალიკაშვილის მდგომარეობა გამთენიისას უკიდურესად გართულდა.
„გამთენიისას მდგომარეობა მკვეთრად გაუარესდა, გულის გაჩერების 4 ეპიზოდი დაფიქსირდა, აქედან 3-ჯერ გულის ამუშავება მოხერხდა, თუმცა, მე-4 ჯერზე, რეანიმაციული ღონისძებების მიუხედავად ვეღარ მოხერხდა გულის მუშაობის აღდგენა. დაახლოებით, დილის 8 საათზე ბილოგიური სიკვდილი დაფიქსირდა“, - აცხადებს ზაზა ლურსმანაშვილი.
შეგახსენებთ, რომ 19 წლის თემირლან მაჩალიკაშვილი 2017 წლის 26 დეკემბერს, სუს-ის მიერ პანკისში ჩატარებული სპეცოპერაციისას თავის არეში დაიჭრა. იგი ამ დრომდე წმინდა მიქაელ მთავარანგელოზის სახელობის მრავალპროფილიან კლინიკურ საავადმყოფოში მკურნალობდა.
