პრეზიდენტის საპარლამენტო მდივნის თანამდებობაზე „ჯი-ეიჩ-ენის „ ინფორმაციით, ანა დოლიძეს გიორგი მარგველაშვილის ამჟამინდელი მრჩეველი, ფიქრია ჩიხრაძე ჩაანაცვლებს.
აღნიშნულის გადასამოწმებლად „ჯი-ეიჩ-ენი“ პრეზიდენტის პრესსამსახურს და თავად ფიქრია ჩიხრაძესაც დაუკავშირდა, თუმცა ინფორმაციას არც უარყოფენ და არც ადასტურებენ და აცხადებენ, რომ ამ თემაზე პრეზიდენტი განცხადებას უახლოეს დღეებში გააკეთებს.
ცნობისთვის, საქართველოს პრეზიდენტმა გიორგი მარგველაშვილმა იუსტიციის უმაღლესი საბჭოს არამოსამართლე წევრის ვაკანტურ თანამდებობაზე ანა დოლიძის კანდიდატურა წარადგინა.
ანა დოლიძე აღნიშნულ პოსტზე ვახტანგ მჭედლიშვილს შეცვლის, რომელსაც 4 - წლიანი უფლებამოსილების ვადა 16 იანვარს ეწურება.
ანა დოლიძე ამ დრომდე პრეზიდენტის საპარლამენტო მდივნის თანამდებობას იკავებდა.
აღსანიშნავია, რომ ფიქრია ჩიხრაძე ამ დროისთვის, პრეზიდენტის მრჩეველია, ის ასევე იყო საქართველოს პარლამენტის სამი მოწვევის დეპუტატი.
