მალე დადგება დრო, როდესაც ყველა ერთად დავახვევინებთ ოლიგარქს და მის მონებს სახელმწიფო დაწესებულებებიდან, - განაცხადა საქართველოს ყოფილმა პრეზიდენტმა მიხეილ სააკაშვილმა მის მიმართ სასამართლოს მიერ დღეს გამოტანილ გადაწყვეტილებაზე საუბრისას ,,რუსთავი 2”-ის ეთერში .
,,ის, რაც მოხდა თბილისში დღეს, არის პუტინის დავალების პირდაპირი შესრულება სამი ქვეყნის ოლიგარქების და მათი ადგილობრივი შემსრულებლების მიერ. ჩვენ უნდა მოვემზადოთ მათ მოსაშორებლად, გამოვაცხადოთ განსაკუთრებული მობილიზაცია და ამაში ჩავერთვები ძალიან აქტიურად. დღევანდელი გადაწყვეტილება არის შეშინებული, დამფრთხალი, პატარა გნომის შურისძიება ჩემს წინააღმდეგ. ის სუსტია, კუთხეშია მიმწყვდეული და ბოლომდე უნდა მივიყვანოთ საქმე. საქართველო ისევ უნდა გავათავისუფლოთ და სწორ გზაზე დადგეს. მიუხედავად პარტიული კუთვნილებისა, დროა ხელები დავიკაპიწოთ, მოვემზადოთ იმ მომენტისთვის, რომელიც მალე დადგება და როდესაც ყველა ერთად დავახვევინებთ ოლიგარქს და მის მონებს სახელმწიფო დაწესებულებებიდან და ჩვენი ცხოვრებიდან”, - განაცხადა სააკაშვილმა ტელეკომპანია ”რუსთავი 2”-ის ეთერში.
სააკაშვილმა აღნიშნა, რომ ის გაასამართლეს ისეთი ბრალდებით, რომლითაც არც ერთი პრეზიდენტი არ გაუსამართლებიათ უახლეს ისტორიაში.
„მას შემდეგ, რაც ეძებეს ჩემი 19 მილიარდის ვილები, ანგარიშები და აღმოჩნდა, რომ მე ქართველი ხალხისთვის არაფერი მომიპარავს საერთოდ და ყველაფერი, რაც გამაჩნდა, მივეცი საქართველოს, ამ მდაბიო ოლიგარქმა, ჩემი გასამართლება გადაწყვიტა იმ ბრალდებით, რომელითაც არც ერთი პრეზიდენტი, უახლოეს ისტორიაში არ გაუსამართლებიათ - შეწყალების შეუზღუდავი უფლების გამოყენებისთვის. ეს არ არის გირგვლიანის საქმე, როგორც ქოცური პროპაგანდა ასაღებს ამას. ეს არის საქმე, ყოფილი სამხედროების, 133 სამხედროს შეწყალების, კომისიის გადაწყვეტილების საფუძველზე, რუსეთ-საქართველოს ომიდან მოკლე ხანში. ეს არის ის ხელისუფლება, ვინც შეიწყალა საერთაშორისო ტერორისტები, რუსი ჯაშუშები, ძალიან საშიში მკვლელები, ნარკოტიკების გამსაღებლები, რომლებიც ასევე კლავდნენ ჩვენს ახალგაზრდობას და ეს ხელისუფლება მასამართლებს მე შეწყალებაზე?!“, - განაცხადა სააკაშვილმა და დასძინა, რომ ვინც მის უკანონო გასამართლებაში მიიღო მონაწილეობა, კანონის მთელი სიმკაცრით აგებს პასუხს.
