სასამართლოს გადაწყვეტილება სააკაშვილის საქართველოში დაუყოვნებლივი დეპორტაციისთვის ყველა შესაძლებლობას იძლევა - ამის შესახებ უკრაინის პარლამენტის დეპუტატმა, „რადიკალური პარტიის“ წევრმა იგორ მოსიჩუკმა განაცხადა.
„სააკაშვილს სამსახურეობრივი უფლებამოსილებების გადამეტებისთვის სამწლიანი პატიმრობა მიესაჯა, ჯერჯერობით საქართველოში. პრეზიდენტის პოსტზე ყოფნისას მან შეიწყალა ბანკის თანამშრომლის მკვლელობაში დამნაშავე სამი ადამიანი, წმინდა წყლის ბოროტმოქმედები. სასამართლოს ეს გადაწყვეტილება მიხეილ სააკაშვილის დამნაშავედ ცნობის შესახებ საქართველოში მისი დაუყოვნებლივი დეპორტაციისთვის ყველა იურიდიულ შესაძლებლობას იძლევა“, - დაწერა მოსიჩუკმა „ფეისბუქის“ საკუთარ გვერდზე.
თბილისის საქალაქო სასამართლომ მიხეილ სააკაშვილს გირგვლიანის საქმეზე 3 წლით თავისუფლების აღკვეთა მიუსაჯა და ამასთანავე ჩამოართვა თანამდებობის დაკავების უფლება 1 წლითა და 5 თვის ვადით.
