„სასწაულების შემქმნელი სააკაშვილის ნაცვლად, ჩვენ მივიღეთ ვირუსი, რომელმაც დააავადა უკრაინის პოლიტიკური სისტემა”, - აცხადებს უკრაინის ვიცე-პრემიერი ივანა კლიმპუშ-ცინცაძე Washington Times-ის მიერ გამოქვეყნებულ სტატიაში სათაურით ,,რეფორმატორი, რომელიც უკრაინას არ სჭირდება“.
მისივე თქმით, საქართველოს ყოფილი პრეზიდენტი, რომელიც უკრაინაში პეტრო პოროშენკოს მიწვევით რეფორმების ჩასატარებლად ჩავიდა, სინამდვილეში “რევოლუციონერი” აღმოჩნდა.
„სასწაულების შემქმნელის ნაცვლად, ჩვენ მივიღეთ ვირუსი, რომელმაც დააავადა უკრაინის პოლიტიკური სისტემა, მას მხოლოდ საკუთარი ეგო და ძალაუფლების დაუოკებელი სურვილი ამოძრავებს”, – წერს ავტორი. აქვე ნათქვამია, რომ უკრაინას ახალი რევოლუცია აღარ სჭირდება, რადგან ის რუსეთს ებრძვის.
,,სააკაშვილი მზადაა გააფორმოს კონტრაქტი ეშმაკთან და მიიღოს დაფინანსება ოლიგარქისგან, რომელსაც ზურგს კრემლი უმაგრებს. ის რუსეთისთვის სასარგებლო თამაშშია ჩართული და მეტიც, გამიზნულად თუ წინასწარი განზრახვის გარეშე ის გახდა ინსტრუმენტი უკრაინისთვის ძირის გამოსათხრელად. ის იყოს კარგი რეფორმატორი საქართველოში, რადგან ყველაფრის გაკეთება შეეძლო, რასაც მოისურვებდა და ფასს არაფრად დაგიდევდათ. უკრაინა ასეთი არ არის და არც უნდა იყოს. ორი რევოლუცია იმისთვის გამოვიარეთ, რომ ხელისუფლებაში ასეთი ძლიერი მმართველი არ მოსულიყო. ავტოკრატი რომ გვსურდეს, დიდი ხნის წინ დავნებდებოდით რუსეთს”, - წერს უკრაინის ვიცე-პრემიერი. მისი შეფასებით, უკრაინის ხელისუფლება უნაკლო არ არის, თუმცა მას სჭირდება ლიდერები, ,,რომლებიც გამოსავალს იპოვიან და არა ადამიანები, რომელთაც მხოლოდ ქაოსი მოაქვთ“.
