ამ წუთებში, თბილისის საქალაქო სასამართლოში, "ნაციონალური მოძრაობის" წევრებისა და აქტივისტების აქცია მიმდინარეობს. სასამართლოსთან შეკრებილები აცხადებენ, რომ საქართველოს ყოფილი პრეზიდენტი სა ოდესის ოლქის ყოფილი გუბერნატორი, მიხეილ სააკაშვილი პოლიტიკური ნიშნით არის დევნილი.
როგორც პარტიის მერობის ყოფილმა კანდიდატმა, ზაალ უდუმაშვილმა განმარტა, აქციის მთავარი მიზანი და მოთხოვნა არის ის, რომ შეწყდეს მიხეილ სააკაშვილის მიმართ დაწყებული პოლიტიკური დევნა, რომელიც მეექვსე წელია საქართველოს მესამე პრეზიდენტის წინააღმდეგ ხორციელდება.
"ამ ყველაფერს არანაირი კავშირი არ აქვს სამართლიანობასთან, ეს არის თავიდან ბოლომდე, პოლიტიკური პროცესი, რომლის დამკვეთიც ბიძინა ივანიშვილია, სწორედ ამიტომ ჩქარობს სასამართლო, რაც შეიძლება სწრაფად დააყენოს განაჩენი. ეს არის ერთი ქართველი ოლიგარქის ბრძოლა საქართველოს მესამე პრეზიდენტის წინააღმდეგ. ეს არის დემოკრატიული და სახელმწიფოებრივი ინსტიტუტების რღვევა საქართველოში, სამწუხაროდ, ქართული სასამართლოს იმედი არ მაქვს, იმიტომ, რომ არ არიან ისეთი მოსამართლეები, როგორიც მაგალითად უკრაინელი მოსამართლე, რომელმაც ორი დღის წინ დააყენა განაჩენი საქმეში", - განაცხადა უდუმაშვილმა.
პარალელურად, თბილისის საქალაქო სასამართლოში მიხელ სააკაშვილის სასამართლო პროცესი მიმდინარეობს. სააკაშვილს ბრალდების მხარე გირგვლიანის მკვლელობის საქმეში სამსახურებრივი უფლებამოსილების ბოროტად გამოყენებას ედავება.
პროკურატურის ბრალდების თანახმად, სააკაშვილის მხრიდან მოხდა დანაშაულის დაფარვა, გამოძიების გაყალბება, დანაშაულში ჩართული მაღალი თანამდებობის პირებისთვის ხელის დაფარება და მათთვის პასუხისმგებლობის თავიდან არიდება.