თბილისის საქალაქო სასამართლოში საქართველოს ყოფილი პრეზიდენტის, მიხელ სააკაშვილის სისხლის სამართლის საქმეზე ბრალდების მხარემ დასკვნითი სიტყვის წარმოთქმა რამდენიმე წუთის წინ დაასრულა.
პროცესის დასრულების შემდეგ ადვოკატმა დავით კაკოიშვილმა ჟურნალისტებს განუცხადა, რომ სააკაშვილის საქმის განხილვა მას შემდეგ დაჩქარდა, რაც საქართველოში უკრაინის პრეზიდენტი, პეტრო პოროშენკო იყო ჩამოსული.
„თბილისის საქალაქო სასამართლოდან გამოთხოვილი ინფორმაციის საფუძველზე ცნობილი გახდა, რომ მოსამართლე გიორგი არევაძე, რომელიც წარმოდგენილ სისხლის სამართლის საქმეს განიხილავს, 2006 წელს ე.წ გირგვლიანის საქმეზე მოსამართლე გიორგი ჩემიას თანაშემწე იყო. შესაბამისად, მისი აცილების შუამდგომლობა დავაყენეთ.
ადამიანის უფლებათა ევროპული სასამართლოს პრაქტიკის მიხედვით, როცა მოსამართლეს, რომელიც იხილავს საქმეს და წარსულში ჰქონდა შეხება მტკიცებულებებთან, საქმის გარემოებებთან, მოწმეებთან ან პროცესის სხვა მონაწილეებთან, ის საქმიდან აუცილებლად აცილებული უნდა იქნეს, რადგან საზოგადოებაში ყოველთვის იარსებებს ეჭვი, მის მიუკერძოებლობასთან დაკავშირებით. არსებობს საფუძვლიანი და სამართლიანი ეჭვი, რომ მოსამართლე გიორგი არევაძე შეეცდება ზეწოლის მოხდენას და აქცენტის მიხეილ სააკაშვილზე გადატანას და მის წინააღმდეგ გამამტყუნებელი განაჩენის გამოტანას. სტრასბურგის სასამართლოს პრაქტიკის მიხედვით, როცა მოსამართლეს აცილების შესახებ შუამდგომლობის დაკმაყოფილებაზე უარს აცხადებს, მან სათანადო არგუმენტები უნდა წარმოადგინოს იმასთან დაკავშირებით, რომ მიუკერძოებელია. დღეს კი სასამართლომ უბრალოდ სიტყვა მოგვცა, რომ იქნება მოუკერზოებელი. მას არანაირი გარანტია არ წარმოუდგენია.
2012 წლიდან მოყოლებული, მთელი ხელისუფლება 2006 წლის სასამართლოს შემადგენლობას აკრიტიკებდა, რომელიც გირგვლიანის საქმეს განიხილავდა, დღეს კი ბრალდების მხარე გაცხოველებით იცავდა მოსამართლეს. საზოგადოებაში კითხვები მოსამართლე გიორგი არევაძის დამოუკიდებლობასთან დაკავშირებით არსებობს და ეს კითხვები პროცესმა კიდე უფრო გააძლიერა.
საქმის განხილვა მას შემდეგ დაჩქარდა, რაც საქართველოში ბატონი პოროშენკო იყო ჩამოსული. ბრალდების მხარემ ფაქტობრივად მტკიცებულებების ნახევარი მოხსნა იმისთვის, რომ დრო მოეგოთ. მათ აქვთ მითითება მიღებული, რომ რაც შეიძლება სწრაფად დადგეს ამ საქმეზე განაჩენი. ეს არის უპრეცედენტო საქმე მსოფლიოს არცერთ ქვეყანას არ ახსოვს პრეზიდენტი თავისი კონსტიტუციური უფლებიდან გამომდინარე განხორციელებული ქმედებების გამო გაესამართლებინათ. ეს საქმე სამართლებრივად აბსურდია, შეუძლებელია შეწყალების გამო პრეზიდენტის სისხლის სამართლებრივ პასუხისგებაში მიცემა. თუ ეს ასე მოხდება ეს ჩვენი კონსტიტუციის ფეხქვეშ გათელვა იქნება“, - განაცხადა ადვოკატმა და აღნიშნა, რომ ბრალდების მხარის წარმოდგენილი ყველა ჩვენება ირიბია.
„ ესენი არიან სააკაშვილის პოლიტიკური ოპონენტები, სოზარ სუბარი, ნინო ბურჯანაძე, გია ნოღაიდელი და ა.შ“, - დასძინა ადვოკატმა.
რაც შეეხება იმ ფაქტს, რომ ინტერპოლმა სააკაშვილის ძებნაზე უარი განაცხადა, იმ შემთხვევაში თუ სააკაშვილის მიმართ გამამტყუნებელი განაჩენი დადგება, იქნება თუ არა ეს დამატებითი ფაქტორი იმისთვის, რომ ძებნა ხელახლა გამოცხადდეს, ადვოკატი აცხადებს, რომ ასე ვერ მოხდება:
„ყველა ნორმალურმა სახელმწიფომ მიხეილ სააკაშვილის მიმართ ნებისმიერი შემზღუდავი ღონისძიების გამოყენებაზე და მის საქართველოში გადმოცემაზეც უარი განაცხადა. ინტერპოლმაც თქვა, რომ ამ საქმეში სამართლებრივზე მეტა პოლიტიკური ელემენტები არსებობდა. შესაბამისად, შეუძლებელია სააკაშვილი საქართველოში იქნას გადმოცემული. ჩვენი ინფორმაციით, უკრაინისა და საქართველოს ხელისუფლებას შორის არსებობს შეთანხმება სააკაშვილის შეზღუდვების დაწესებასთან დაკავშრირებით“, - განაცხადა კაკოიშვილმა.
სააკაშვილის საქმეზე მომდევნო პროცესი 13 დეკემბერსაა ჩანიშნული. ამ დღეს დაცვის მხარე დასკვნით სიტყვას წარმოთქვამს. მიხეილ სააკაშვილს სამსახურეობრივი უფლებამოსილების ბოროტად გამოყენებას ედავებიან. რაც, როგორც პროკურორმა აღნიშნა, იმ უკანონო შეპირებას მოიცავს, რომელიც სააკაშვილის მიერ გირგვლიანის საქმის არგახსნის, მასში მონაწილე ორგანიზატორების და შემკვეთების არმხილების და მართლმსაჯულების არაღსრულების კუთხით განხორციელდა.
