„ჯანდაცვამ ჩემისთანა, ძაძებში ჩაცმული დედების მიმართ ცოტა მეტი ყურადღება გამოიჩინოს და ექიმებს მიხედონ, მკვლელ ექიმებს ნუ აფარებენ ხელს!“, - განუცხადა „ჯი-ეიჩ-ენს“ გარდაცვლილ 19 წლის შოთიკო ცირგაიას დედამ, ირინე წურწუმიამ.
ცირგაიას ოჯახის წევრებმა ზუგდიდის რეფერალურ საავადმყოფოსთან დღეს აქცია გამართეს. ოჯახის წევრები იმ ექიმის დასჯას მოითხოვენ, რომელიც მათ შვილს მკურნალობდა და არასწორი დიაგნოზი დაუსვა.
„ ერთი წელია დავდივარ, ვაწუხებ ხალხს და სამართალს ვერ მივაღწიე! ამათგან არაფერს ველი, უბრალოდ მოვედი აქ, რომ ამ მკვლელებს გავახსენო, ჩემი შოთიკოს სიკვდილიდან ერთი წელი გავიდა. ამათგან არაფერს ველი, სანთლები დავანთე, შოთიკოს ბოლო წუთები გავიხსენე და სახლში წავალ.
ჯანდაცვისგან მოვითხოვ ექსპერტიზის დასკვნას, სადაც ეწერება, არის თუ არა, ექიმი მაია ჯალაღონია, რომელმაც დამღუპა, დამნაშავე. ბოლოს და ბოლოს, დაასრულონ ეს ამბავი! თურმე, ჩემი შვილის მდგომარეობა უმძიმესი იყო, კლინიკის დირექტორს კი ჩემი შვილიც და სხვა, მისნაირად მძმე მდგომარეობაში მყოფი პაციენტები ზუგდიდის საავადმყოფოში ჩვეულებრივ პალატაში ჰყავს“, - აცხადებს წურწუმია.
19 წლის შოთიკო ცირგაია პირველად სამედიცინო დაწესებულებაში 2016 წლის 17 ნოემბერს მოათავსეს. პნევმონიის დიაგნოზის მკურნალობის შემდეგ ავადმყოფი ბინაზე გაწერეს. მისი ჯანმრთელობის მდგომარეობა რამდენიმე დღის შემდეგ დამძიმდა, რის შემდეგაც პაციენტის თბილისში გადაყვანა გახდა აუცილებელი, თუმცა ცირგაია გადაყვანის დროს გარდაიცვალა.
