მთავრობა მორიგ დათმობაზე მიდის და უძრავი ქონების გასხვისებისას, თუ აღნიშნულ ქონებას პირი ორ წელზე მეტ ხანს ფლობდა, საშემოსავლო გადასახადს აღარ გადაახდევინებს. როგორც სააგენტო "ჯი-ეიჩ-ენთან" საუბრისას, ფინანსთა მინისტრის მოადგილემ ირაკლი სირაძემ განაცხადა, არსებული საგადასახადო კოდექსით ეს დაბეგვრადი არ იყო, თუმცა ახალ საგადასახადო კოდექსში გათვალისწინებული იყო მუხლი, რომელიც ქონების გასხვისებისას პირის საშემოსავლო გადასახადის დაბეგვრას ითვალისწინებდა. თუმცა მას შემდეგ, რაც მთავრობამ ახალი საგადასახადო კოდექსის პროექტში გარკვეული ცვლილებები შეიტანა, ეს საკითხი დღის წესრიგიდან მოიხსნა და მისი დაბეგვრა აღარ მოხდება.
პრემიერ-მინისტრის მრჩეველი კერძო სექტორთან ურთიერთობის საკითხებში გიორგი პერტაია სააგენტო "ჯი-ეიჩ-ენთან" საუბარში ამბობს, რომ ახალი საგადასახადო კოდექსის რევიზიისას ე.წ. "კეპიტალ გეიმთან" დაკავშირებით პრეტენზიები არსებობდა.
"შენიშვნები იყო ძირითადად დღგ-ის ავანსთან დაკავშირებით. გარკვეული შენიშვნები იყო ასევე ე.წ. "კეპიტალ გეიმთან" დაკავშირებით, რომელიც პირს საშემოსავლო გადასახადის გადახდას ავალდებულებდა, თუ ქონების ღირებულება 30 ათას ლარსს აღემატებოდა. ახალი საგადასახადო კოდექსის პროექტთან დაკავშირებით პრეტენზიები არსებობდა ასევე ქრონომეტრაჟის, განათლებისა და ჯანდაცვის სფეროს დაბეგვრასთან დაკავშირებით", _ განაცხადა გიორგი პერტაიამ.
შეგახსენებთ, რომ დღეს მთავრობის სხდომაზე პრემიერ-მინისტრმა გააჟღერა რომ ახალ საგადასახადო კოდექსთან დაკავშირებით შესული შენიშვნებიდან მთავრობამ 80 პროცენტი გაითვალისწინა.
"საზოგადოებას რამდენიმე კვირის წინ ახალი საგადასახადო კოდექსის პროექტი წარვუდგინეთ, რაზედაც განხილვები გვქონდა ფინანსთა მინისტრთან, ინვესტორებთან და ბიზნესმენებთან. ახალი საგადასახადო კოდექსის პროექტი გამოქვეყნებული იყო ინტერნეტით მთავრობისა და ფინანსთა სამინისტროს საიტებზე. ამ დროისთვის შემოსულია 500 შენიშვნა, რომელიც ჩვენი მხრიდან არის განხილული, რა თქმა უნდა, ბიზნესის წარმომადგენლებთან ერთად და ამ შენიშვნებიდან 80 პროცენტი არის გათვალისწინებული. რაც შეეხება დარჩენილ 20 პროცენტს, მას რიგი მიზეზების გამო ვერ გავითვალისწინებთ", - განაცხადა პრემიერ-მინისტრმა.
გილაურის განცხადებით, ახალი საგადასახადო კოდექსის პროექტის განახლებული ვარიანტი 10 ივლისიდან დაიდება მთავობისა და ფინანსთა სამინისტროს საიტებზე და მთავრობა ერთი კვირის განმავლობაში კოდექსთან დაკავშირებით შენიშვნების მიღებას გააგრძელებს.
გილაურის განცხადებით, ხელისუფლებას და ბიზნესს ერთი კვირა რჩება, ვიდრე პარლამენტი ახალი საგადასახდო კოდექსის მეორე მოსმენით მუხლობრივ განხილვას ფაიწყებს. გილაური აცხადებს, რომ ახალი საგადასახადო კოდექსის დამტკციების შემდეგ ის სრულყოფილად ძალაში 2011 წლის 1-ლი იანვრიდან შევა. თუმცა მანამდე 2010 წლის 1-ელ აგვისტოდან გარკვეული მუხლები შევა ძალაში.