დღეს საქართველოში პოლიტიკას აქვს კაცის სახე, - ამის შესახებ ბაია პატარაიამ პარლამენტში, გენდერული კვოტირების საკანონმდებლო ინიციატივის განხილვაზე განაცხადა.
მისი თქმით, კარგია, რომ დეპუტატებს გენდერული კვოტირების საკანონმდებლო ინიციატივაზე პოზიტიური შეფასება აქვთ, თუმცა, რეალურად საქმე არც თუ ისე პოზიტიურად გვაქვს.
როგორც პატარაიამ აღნიშნა, დღეს საქართველოში ვერც ერთი პოლიტიკური პარტია ვერ ქმნის ისეთ ამინდს, სადაც მხოლოდ კომპეტენციებით წყდება ეს საკითხი. მისივე თქმით, სწორედ ეს რეალობა გვიბიძგებს იმისკენ, რომ კანონით დავარეგულიროთ ეს მდგომარეობა.
"85% პარლამეტში კაცები არიან, 89% ადგილობრივ თვითმმართველობაში კაცები არიან, აღმასრულებელ ხელისუფლებაში, მერობაზე თუ ვისაუბრებთ, 100%-ით კაცები არიან, და ახლა უკვე, როცა თვალს ვადევნებთ კანდიდატების წაყენებას, აქაც ვხედავთ, რომ დიდი გარღვევა წინ, ჩვენ არ გვაქვს.
არ გვაქვს იმედი, რომ ეს ბუნებრივად მალე გამოსწორდება, ამიტომ ვუჭერთ ჩვენ კვოტებს მხარს. რომ იყოს ჩვენი პოლიტიკური კულტურა მართლაც მერიტოკრატიული, მე დარწმუნებული ვარ, რომ საქართველოში ქალებს არავისგან დახმარება არ სჭირდებათ, იმისთვის რომ იყვნენ წარმატებულები, განათლებულები, კომპეტენტურები. მაგრამ, დღეს საქართველოში ვერცერთი პოლიტიკური პარტია ვერ ქმნის ისეთ ამინდს, სადაც მხოლოდ კომპეტენციებით წყდება ეს საკითხი. სწორედ ეს რეალობა გვიბიძგებს იმისკენ, რომ კანონით დავარეგულიროთ ეს მდგომარეობა", - აღნიშნა ბაია პატარაიამ.