”ახალი საქართველოს” ლიდერი გიორგი ვაშაძე ”ნაციონალური მოძრაობის” წევრის, ნიკა მელიას განცხადებას კეზერაშვილთან დაკავშირებით ეთანხმება და აცხადებს, რომ მისი მსგავსი ადამიანები ”ნაციონალური მოძრაობის” ხელისუფლებისთვის ყოველთვის პრობლემა იყო.
”კეზერაშვილთან დაკავშირებით პოზიტიური შეფასებებით არასოდეს გამოვირჩეოდი. ვფიქრობ, მსგავსი ადამიანები ”ნაციონალური მოძრაობის” ხელისუფლებისთვის ყოველთვის პრობლემა იყო. მე შემიძლია დავეთანხმო ნიკა მელიას, ეს არის ადამიანი, რომელიც როგორც ჩანს დალაგდა ბიძინა ივანიშვილთან და მასთან ერთად აკეთებს ფულს. ასეთი ადამიანების დრო საქართველოში უნდა დასრულდეს”, - აღნიშნა გიორგი ვაშაძემ.
რაც შეეხება ”ევროპულ საქართველოს” შესაძლო დაფინანსებას, გიორგი ვაშაძის თქმით, გამორიცხული არაფერია. ”მეც მაქვს ამასთან დაკავშირებით ინფორმაცია, საიდან ამხელა ფული ”ევროპულ საქართველოს”? როგორც ჩანს, მას ჰყავს გულშემატკივრები”, - განაცხადა ვაშაძემ.
დავით კეზერაშვილი ყაჩაღობით ნაშოვნი ფულით აფინანსებს „ევროპულ საქართველოს“, - ამის შესახებ ენმ-ის ერთ-ერთმა ლიდერმა ნიკა მელიამ „TV პირველის“ ეთერში განაცხადა. მისივე თქმით, დავით კეზერაშვილი „ნაციონალური მოძრაობის“ სირცხვილი იყო.