„ინფორმაციამ გაჟონა, რომ კობა გოგატიშვილი ჩემთან შეხვედრაზე იმყოფებოდა და ის ახლა პროკურატურის მხრიდან ზეწოლის ქვეშ იმყოფება“, - განუცხადა „ჯი-ეიჩ-ენ-ს“ ე.წ. კორტების საქმეზე მსჯავრდებულ ირაკლი ფირცხალავას მეუღლემ, ნინო ხვიტიამ.
მან დღეს პროკურატურაში დაგეგმილ გამოკითხვაზე უარი განცხადა.
„განვითარებული მოვლენების გააზრებამ პროკურატურის მიმართ ძალიან დიდი უნდობლობა გამიჩინა. ასევე მათი ერთ-ერთი მთავარი ფიგურის, მამუკა ვასაძის მიმართაც. მისი გვარი ჩემი მეუღლის საქმეში მუდმივად ფიგურირებს. გია სოსანაშვილიც აცხადებდა, რომ 15 თუ 17 საათის განმავლობაში, დაბმული იყო და მამუკა ვასაძე აიძულებდა, ირაკლი ფირცხალავასთვის დაედო ხელი, თითქოს, მან დაუკვეთა მკვლელობა. რადგან, ის არის საგამოძიებო ნაწილის კურატორი და მან უნდა გამოიძიოს საქმე, ეს ჩემში დიდ უნდობლობას იწვევს. სწორედ, ამის გამო არ მინდა პროკურატურაში წასვლა.
არ ვთვლი, რომ გამოძების პროცესი ობიექტური იქნება, არც ჩემი დაკითხვაა უსაფრთხო. ამიტომ, მინდა თავიდან ავიცილო გარკვეული ზეწოლები და ეს პროცედურა სასამარათლოში, მოსამართლის, ადვოკატის, სახალხო დამცველის წარმომადგენლის თანდასწრებით ჩატარდეს“, - აღნიშნა ხვიტიამ.
ე.წ. კორეტების საქმის ერთ-ერთი მთავარი მოწმე, კობა გოგატიშვილი აცხადებს, რომ მსჯავრდებულ ფირცხალავას ოჯახის წევრებმა, მათ შორის, მეუღლემ და შვილმა, მასზე ზეწოლა განახორციელეს. მისივე თქმით, მას მუქარის შემცველ შეტყობინებებს უგზავნიდნენ, ამას შემდეგ ის იძულებული გახდა ფირცხალავას მეუღლესა და შვილს შეხვედროდა. გოგატიშვილის განმარტებითვე, ხვიტიამ მას სასამართლოში მიცემული ჩვენების შეცვლის სანაცვლოდ 30 000 დოლარი შესთავაზა. თავის მხრივ კი, ხვიტია ირმწუნება, რომ მსგავს ფაქტს ადგილი არ ჰქონია და შევხედრას თავად გოგატიშვილი სთხოვდა.
„ეს ბრალდებები მაღალი ალბათობით, ადვოკატ გაგი მოსიაშვილის მიერაა ნაკარნახები. გჯერათ, რომ კობა გოგატიშვილს ჩემი და ჩემი 18 წლის შვილის შეეშინდა და ამიტომ მოვიდა ჩემთან და ამიტომ ისაუბრა ყველაფერზე? წარმოადგინოს ჩემ მიერ, ან სხვა ვინმეს მიერ გაგზავნილი მუქარის შემცველი შეტყობინებები. ეს ადამიანი ჩემი ტელეფონის ნომერს ადვოკატ მალხაზ ველიჯანაშვილთან ეძებდა. თუ მას შეტყობინებებს მე ვუგზავნიდი და ვემუქრებოდი, ნომერს ველიჯანაშვილთან რატომ ეძებდა? ის ჩემს მიერ გაკეთებულ ჩანაწერში ამბობს, რომ ჩემი მოძებნა დიდი ხნის განმავლობაში სურდა.
რა ფულზეა საუბარი? ჩანაწერში კარგად ჩანს, რომ მსგავს არაფერს ჰქონია ადგილი. ჩვენს შორის პირადი კომუნიკაცია 40 წუთის განმავლობაში მიმდინარეობდა, ჩანაწერი სრულია, წყვეტა არც მანამდე და არც მერე ყოფილა. ეს ჩანაწერი სახლახო დამცველს და „რუსთავი2“-ს გადავეცით, მათ ამის შესახებ სიუჟეტი მოამზადეს. როცა დაკითხვაზე მივალ, ამ ჩანაწერს სასამართლოშიც წარვადგენ და სამართლებლებრივ ღონისძიებებსაც დავიწყებ. “, - განუცხადა „ჯი-ეიჩ-ენ-ს“ ნინო ხვიტიამ.
მისივე განმარტებით, გოგატიშვილს სასამართლოსთვის მიცემული ცრუ ჩვენების შეცვლა სურდა და ამის შესახებ მან სახალხო დამცველსაც განუცხადა.
„მან ინფორმაცია მოგვაწოდა კორტების საქმესთან დაკავშირებით. როგორც იცით, ის ერთ-ერთი მთავარი მოწმე იყო. მან თქვა, რომ მის მიერ მიცემული ჩვენება ზეწოლის შედეგად იყო განპირობებული და უნდოდა, რომ ჩემთვის სიმართლე ეთქვა. ეს ყველაფერი ჩანაწერში მკაფიოდ ისმის. ის ამ ყველაფერს არამხოლოდ ჩემთან ჰყვება, სახალხო დამცველთანაც იგივეს იმეორებს. ის ამბობდა, რომ შეწუხებული იყო იმით, რომ მისი ბრალდების საფუძველზე მოხდა მსჯავრდებულებისთვის მაღალი სასჯელის მიცემა და თავისი დანაშაულის გამოსწორება სურდა.
სასამართლოზე რატომ არ თქვი სიმართლე-მეთქი, ვკითხე. მინდოდა მეთქვა, მაგრამ 8 სპეცრაზმელი მომყვებოდა და იმის საშუალებას არ მაძლევდნენ, სიმართლე მეთქვაო. მისივე თქმით, მანქანასთან დაკავშირებით შეემთხვა ინციდენტი, მის წიანაღმდეგ საჩივარი იყო და დაემუქრნენ, რომ დაიჭერდნენ, ციხეში ჩასვამდნენ. მუქარასთან დაკავშირებით, მან მამუკა ვასაძე და კახა სვანიძე დაასახელა. ისინი გოგატიშვილს გარკვეულ სარგებელსაც ჰპირდებოდნენ. როგორც ჩანს, ის ახლა ამ სარგებლით უკმაყოფილოა. თან სინდისიც აწუხებს, თან შიშიც აქვს ჩემი მეუღლის და ცააძის მიმართ, რომ მათ წინააღმდეგ ცრუ ჩვენება მისცა“, - აცხადებს ნინო ხვიტია.
ცნობისათვის, პროკურატურა გამოძიებას აწარმოებს მოწმის მიმართ განხორციელებული მოსყიდვისა და მასზე განხორციელებული მუქარის შესაძლო ფაქტზე საქართველოს სსკ-ის 372-ე მუხლის მეორე ნაწილით გათვალისწინებული დანაშაულის ნიშნებით.