„ეს უნდა იყოს მთავრობა, რომელიც ორიენტირებული იქნება საკუთარი ქვეყნის მოქალაქეებზე,“ - ასე ხსნის დემოკრატიული მოძრაობა - თავისუფალი საქართველოს თბილისის მერობის კანდიდატი, კახა კუკავა, წინასაარჩევნო კლიპში ეროვნული მთავრობის არსებობის აუცილებლობას.
კუკავამ აღნიშნა, რომ არალეგალური მიგრანტების დეპორტაცია მისი გუნდის საარჩევნო პროგრამაშია.
„ჩვენ ვაპირებთ ჰიჯაბის აკრძალვას და ვაპირებთ, რომ ამ საკანონმდებლო ინიციატივით მივმართოთ პარლამენტს,“ - განაცხადა კახა კუკავამ ,,რუსთავი 2” - ის ეთერში.
მისივე თქმით, ის რომ ნინო ბურჯანაძე პრორუსული ძალაა, მხოლოდ რუსთავი2-ის და ნაციონალური მოძრაობის შეფასებებია.
„მე არ წარმომადგინა ნინო ბურჯანაძის პარტიამ. ეს არის ბლოკი. ეს არის ორი პარტიის ბლოკი და არა ერთი პარტია. ეს არის რუსთავი2-ის და ნაციონალური მოძრაობის შეფასებები. მე არ ვიცი, საქართველოში სხვა ვინ იზიარებს ამ მოსაზრებას, რომ პოლიტიკური ძალა, ან პოლიტიკური ლიდერი, რომელიც მხარს უჭერს რუსეთთან არა სამხედრო გზით საკითხების გადაწყვეტას, არამედ დიპლომატიური გზით გადაწყვეტას, თურმე ეს არის პრორუსული,“ - განაცხადა კახა კუკავამ.
კუკავა აცხადებს, რომ მისთვის პრორუსული ძალების კანდიდატად მოხსენიება შეურაცხმყოფელია.