სავსებით შესაძლებელია, მისმა [მიხეილ სააკაშვილის] პარტნიორებმა ვაშინგტონში ის გადმორთონ საქართველოზე, გააქტიურონ, დააბრუნონ ქართულ მიმართულებაზე, - ამის შესახებ ექსპერტმა და პოლიტოლოგმა გია ხუხაშვილმა გაზეთ "ქრონიკა პლუსი"-სთვის მიცემულ ინტერვიუში განაცხადა.
მისი თქმით, უკრაინულ პოლიტიკაში ინტეგრირებული სააკაშვილი, სადაც ის უკვე მარგინალიზებული იყო, საქართველოს ხელისუფლებისთვის საკმაოდ კომფორტული სიტუაცია იყო ორი მიზეზის გამო. როგორც ხუხაშვილი განმარტავს, ერთი იმიტომ, რომ მისი მარგინალიზება ხდებოდა, რისი პოლიტიკური ინტერესიც ხელისუფლებას აქვს და მეორეც, უბრალოდ, ვერ იცლიდა საქართველოსთვის.
"უკრაინულ პოლიტიკაში ინტეგრირებული სააკაშვილი, სადაც ის უკვე მარგინალიზებული იყო, ჩვენი ხელისუფლებისთვის საკმაოდ კომფორტული სიტუაცია გახლდათ ორი მიზეზის გამო. ერთი იმიტომ, რომ მისი მარგინალიზება ხდებოდა, რისი პოლიტიკური ინტერესიც ხელისუფლებას აქვს და მეორეც, უბრალოდ, ვერ იცლიდა საქართველოსთვის, იმდენად იყო ჩაფლული უკრაინულ ბაკქანალიაში.
სავსებით შესაძლებელია, მისმა პარტნიორებმა ვაშინგტონში ის გადმორთონ საქართველოზე, გააქტიურონ, დააბრუნონ ქართულ მიმართულებაზე, მისგან ერთგვარი გიულენის ქართული მოდელი შექმნან, რომელსაც ხელისუფლების ირიბი კონტროლისთვის გამოიყენებენ.
არ ვამბობ, რომ მისი პირდაპირი რეინტეგრაცია მოხდება, მაგრამ ის, როგორც ფაქტორი, ქართულ პოლიტიკაში, შეიძლება, დაბრუნდეს", - განაცხადა გია ხუხაშვილმა, რომელმაც აქვე აღნიშნა, რომ "მიხეილ სააკაშვილი "ბომჟად" კი არა, მსოფლიო მოქალაქედ იქცა". მისივე თქმით, თუ ვინმე უწყობდა ხელს საქართველოს ხელისუფლებიდან უკრაინის მოქალაქეობის გარეშე სააკაშვილის დარჩენას, "მას პოლიტიკის არაფერი გაეგება".
