დეკანოზ გიორგი მამალაძესთან შეხვედრაზე იმყოფებოდა ადვოკატი მიხეილ რამიშვილი. მან რამდენიმე წუთის წინ დატოვა საპყრობილე. როგორც „ჯი-ეიჩ-ენ-ს“ რამიშვილმა განუცხადა, დეკანოზი სიმართლის დასადგენად ბოლომდე იბრძოლებს.
„მამა გიორგი საბრძოლო განწყობაზეა და ამ შემართებით იბრძოლებს სიმართლის დასადგენად. ჩვენ ვისაუბრეთ იმ უსმართლობაზე, უაკნონობაზე, რომელიც მის მიმართ განხორციელდა და ასევე, იმ ადამიანების ახირებებზე, რომელთა მხრიდანაც ამ ყველაფრის მოწყობა მოხდა. მე მგონი, ყველასთვის ცნობილია ეს ყველაფერი ვის ინტერესებშიც შედიოდა. როგორც საპატრიარქოშია ბევრი საკითხი დასალაგებელი და გასარკვევი, ისე საერო პირებთანაც, მთელი სახელმწიფო სისტემაა ამ საქმეში ჩართული“, - აცხადებს „ჯი-ეიჩ-ენ-თან“ დეკანოზის ადვოკატი, მიხეილ რამიშვილი.
დეკანოზთან შეხვედრას ადვოკატები მომდევნო კვირაშიც გეგმავენ.
„მამა გიორგისთან ძალიან ხშირად დავდივართ, ბევრ საკითხზე ვყალიბდებით. სასამართლოს სამოტიცვაციო ნაწილს ველოდებით, ალბათ, 2 კვირაში ჩაგვბარდება. თუ წინასწარ გამზადებული აქვთ, ამდენი დროც არ დასჭირდებათ. მას შემდეგ, რაც სამოტივაციო ნაწილი ჩაგვბარდება, სააპელაციო სასამართლოში გავასაჩივრებთ“, - განაცხადა რამიშვილმა.
შეგახსენებთ, რომ გიორგი მამალაძეს გამამტყუნებელი განაჩენი 5 სექტემბერს გამოუტანეს და მას 9 წლით თავისუფლების აღკვეთა მიესაჯა.