„მამა გიორგის გასაჩივრებაზე უარის თქმა და პრეზიდენტისთვის შეწყალების თხოვნით მიმართვა შეუძლია. თუმცა, პირდაპირ შემიძლია გითხრათ, რომ ის ამაზე უარს აცხადებს. დეკანოზის თქმით, მას შესაწყალებელი არაფერი სჭირს, რადგან თავს უდანაშაულოდ მიიჩნევს“, - განუცხადა „ჯი-ეიჩ-ენ-ს“ გიორგი მამალაძის ადვოკატმა, მიხეილ რამიშვილმა.
ადვოკატის განცხადებით, დეკანოზი გამამტყუნებელი განაჩენით გულნატკენია, თუმცა, ბრძოლის შეწყვეტას არ აპირებს.
„განაჩენს ძალიან ვაჟკაცურად შეხვდა. თუმცა, გულნატკენი იყო იმ უკანონო განაჩენზე, რომელიც მოსამართლე ბესიკ ბუგიანიშვილმა გამოიტანა. ამის მიუხედავად, მამა გიორგი ოპტიმისტურადაა განწყობილი, ის ძალიან ძლიერი სულის პატრონია და თავის სიმართლეში იმდენადაა დარწმუნებული, მზადაა თავისი უდანაშაულობა ბოლომდე დაამტკიცოს.
თუ საქართველოს ვერცერთ ინსტანციაში სამართალს ვერ მივაღწიეთ, სტრასბურგი აუცილებლად მიიღებს გამამრთლებელ გადაწყვეტილებას. საქმის აღძვრიდან განაჩენის გამოტანამდე უამრავი დარღვევა დაფიქსირდა. როგორც სანდრო გვირგვლიანის საქმეზე გააშიშვლა სტრასბურგის სასამართლომ თავისი გადაწყვეტილებით ჩვენი მართლმსაჯულება, ასე იქნება ამ საქმეზეც, უფრო სწორად, ეს იქნება ათჯერ გამაშიშვლებელი გადაწყვეტილება. ეს ჩვენთვის უბრალოდ სირცხვილი იქნება“, - აცხადებს მიხეილ რამიშვილი.
მისივე განცხადებით, დეკანოზმა ჯანმრთელობის პრობლემის გამო ამჯობინა განაჩენი საკანში გაეგო.
„კარგს და ცუდ ამბავს, როგორც სასამართლოში, ასევე ციხეშიც გაიგებდა. ამას გარდა, ის მკურნალობის პროცედურებს გადის და იმ დღეს მთლად კარგად არ იყო. გულზე ოპერაცია აქვს გაკეთებული, ამას გარდა, ხერხემალზეც აქვს პრობლემები, ასევე ალერგიულიც არის. შესაბამისად, ძალიან დიდი დაკვირვების, კონტროლის ქვეშ იმყოფება“, - აცხადებს რამიშვილი.
„ჯი-ეიჩ-ენ-ის“ ინფორმაციით, ადვოკატები დეკანოზ გიორგი მამალაძესთან შეხვედრას ხვალ გეგმავენ.
შეგახსენებთ, რომ გიორგი მამალაძეს გამამტყუნებელი განაჩენი 5 სექტემბერს გამოუტანეს.
