ვენეციის კომისიის საბოლოო დასკვნა ცალსახად დადებითი და პოზიტიური უნდა იყოს, - ამის შესახებ პარლამენტის ვიცე-სპიკერმა თამარ ჩუგოშვილმა ჟურნალისტებთან განაცხადა.
,,ვენეციის კომისიის პირველი რეკომენდაციები უკვე მიღებული გვაქვს, რომელიც უფრო მეტად მეორე ხარისხოვან საკითხებს ეხებოდა, რადგან ვენეციის კომისია პოლიტიკურ საკითხებზე დოკუმენტის სულისკვეთებას ფაქტიურად ითვალისწინებდა და იზიარებდა. ფაქტობრივად, ყველა რეკომენდაცია გავითვალისწინეთ, რაც დოკუმენტში იყო ასახული. შესაბამისად, ველოდებით, რომ უშუალოდ დოკუმენტის შინაარსთან დაკავშირებით, ვენეციის კომისიის საბოლოო დასკვნა ცალსახად დადებითი და პოზიტიური უნდა იყოს“, - აღნიშნა დეპუტატმა.
მისივე თქმით, კონსტიტუციურ პროექტში ვერანაირი პრინციპული საკითხი ვეღარ გადაიხედება.
„პროპორციული სისტემა მესამე მოსმენის საკითხი არ არის, რადგან ჩვენ რედაქციული შესწორებების ეტაპზე ვიმყოფებით. კონსტიტუციურ პროექტში ვერანაირი პრინციპული საკითხი ვეღარ გადაიხედება. ამიტომ, რედაქციული ხასიათის შენიშვნების გათვალისწინების სივრცე არსებობს, თუკი ასეთი იქნება“, - დასძინა ჩუგოშვილმა.
საკანონმდებლო ორგანო კონსტიტუციური ცვლილებების მესამე მოსმენით მიღებას სექტემბრის ბოლოს გეგმავს.