ექსპერტი ეკონომიკის საკითხებში, პაატა შეშელიძე ლარის გაუფასურებას ხელოვნურად გამოწვეულ პროცესებს უკავშირებს.
როგორც მან „ჯი-ეიჩ-ენთან“ საუბრისას განაცხადა, კონკრეტული მიზეზის დასახელება რთულია.
„სავარაუდოდ, ბოლო პერიოდში, ფინანსთა სამინისტრომ ღია ბაზარზე დამატებით აიღო სესხი და ალბათ, ეს თანხა ხანძრის ჩაქრობის სამუშაოებზე გამოიყენეს. სხვა ისეთი ნაბიჯი, რაც ლარის კურსის მკვეთრ გაუარესებას გამოიწვევდა, მთავრობას არ გადაუდგამს.
არის კიდევ ერთი ვარაუდი, არჩევნების წინ ხომ არ არის თანხები დახარჯული რომელიმე კომპანიის მხარდასაჭერად ან ირიბად ხომ არ არის ჩატარებული ტენდერები, რომელიც შეიძლება შემდეგ იყოს მიბმული საარჩევნო კამპანიასთან“, -განაცხადა ექსპერტმა.
რაც შეეხება სამომავლო პროგნოზებს, პაატა შეშელიძის აზრით, ლარის დასტაბილურება ეროვნულ ბანკს ძალიან მარტივად შეუძლია.
„გარე ფაქტორებზე საუბარი არ ღირს, ლარის დასტაბილურება ეროვნულ ბანკს ძალიან მარტივად შეუძლია. ეს ყველაფერი ხელოვნურად არის გამოწვეული და რთულია პროგნოზირება, ვინ როგორ გამოიყენებს ამ ყველაფერს“- განმარტა შეშელიძემ.
დღეს, ერთი დოლარის ღირებულება 2.4802 ლარია, ერთი ევროს ღირებულება კი 2.9579 ლარი.