„ბავშვთა სამყაროს“ მოვაჭრეთა ადვოკატი, ფრიდონ სიხუაშვილი რამდენიმე დღის წინ, ექსპერტიზის დასკვნას გაეცნო, საიდანაც ირკვევა, რომ ხანძარი ხელოვნურად, ნავთობპროდუქტებზე ცეცხლის წაკიდებით გაჩნდა. ამის შესახებ „ჯი-ეიჩ-ენ-ს“ ფრიდონ სიხუაშვილმა განუცხადა.
„ექპერტიზის დასკვნის თანახმად, სახანძრო უსაფრთხოების წესები დაცული არ იყო. დასკვნაში წერია, წესები დაცული რომ ყოფილიყო, ასეთი მასშტაბის ხანძარი არ მოხდებოდა და თავიდანვე მოხერხდებოდა რეაგირება. ექპსერტი პირადპირ წერს, რომ 83-დან 87 კილოგრამამდე ნავთობპროდუქტზე ცეცხლის განზრახ წაკიდებამ გამოიწვია ამ მასშტაბის ხანძარი“, - აცხადებს „ჯი-ეიჩ-ენ-თან“ სიხუაშვილი.
ადვოკატის განცხადებით, გამოძიება შეგნებულად ჭიანურდება.
„ძალიან ბევრი კითხვაა, მათ შორის, საიდან გაჩნდა იქ ნავთობპროდუქტები? ვინ მიიტანა? ცეცხლი ვინ წაუკიდა? უსაფრთხოების წესები რატომ არ იყო დაცული? მთავარი პროკურატურისგან ამ კითხვებზე პასუხს, დამნაშავეების დადგენას, საბრალდებო სკამზე დასმას ვითხოვთ. თუ ეს ყველაფერი არ გააკეთეს, დავასკვნით, რომ ამ საქმეში ხელისუფლება ურევია და ამ საქმის ობიექტური, სწრაფი და დროული გამოძიება არ სურთ. მხოლოდ გიორგი მაჭავარიანი არ არის შემსრულებელი, შემსრულებლები, დამკვეთები სხვები არიან. ხანძრის გაჩენას მხოლოდ რიგითი თანამშრომელი რომ ვერ შეძლებდა, ეს ცხადია“, - აცხადებს ადვოკატი.
შეგახსენებთ, რომ „ბავშვთა სამყაროში“ ხანძარი 2017 წლის 30 იანვარს მოხდა.
მომხდარზე გამოძიება სისხლის სამართლის კოდექსის 187-ე მუხლით მიმდინარეობს, რაც სხვისი ნივთის დაზიანებას ან განადგურებას გულისხმობს.
