19 სექტემბერს სასამართლოში იმ ახალ არსებით მტკიცებულებას წარმოვადგენთ, რომელიც საფუძველი გახდება ოთარ აბესაძის პატიმრობიდან გათავისუფლების, - ამის შესახებ ოთარ აბესაძის ადვოკატმა ირმა ჭკადუამ სასამართლო სხდომის დატოვების შემდეგ განაცხადა.
მისი თქმით, სასამართლომ აბესაძე პატიმრობაში დატოვა.
"სასამართლო პროცესზე სამედიცინო ბარათი წარვადგინეთ, აღნიშნული სასამარლომ როგორც მტკიცებულება საქმეს დაურთო. შემდეგ პროცესზე დაიკითხებიან ის ადამიანები, რომლებიც დასაკითხ პირთა სიაში მივუთითეთ. სასამართლომ ჩვენი შუამდგომლობა აღკვეთის ღონისძიების შეცვლასთან დაკავშირებით არ გაითვალისწინა და ის პატიმრობაში დატოვა. 19 სექტემბერს სასამართლოში იმ ახალ არსებით მტკიცებულებას წარმოვადგენთ, რომელიც საფუძველი გახდება ოთარ აბესაძის პატიმრობიდან გათავისუფლების. მოწმეები, რომლებიც სასამართლოზე მოვლენ და ჩვენებას მისცემენ, დაადასტურებენ რომ ოთარ აბესაძეს არავისგან ქრთამი არ აუღია და არავისთვის იმ დახმარებაში, რა დახმარებაც გაუწია, ქრთამი არ მოუთხოვია. ამის ჩვენებას მოწმეები სასამართლოს მისცემენ. რაც შეეხება მის ჯანმრთელობის მდგომარებას, მისი ფსიქოემოციური მდგომარეობა, რა თქმა უნდა, მძიმეა. მან დღეს სასამართლოს ცრემლიანი თვალებით მიმართა და უთხრა რომ ყველაზე ახალგაზრდა პროფესორს, ყველაფერი თავზე დაენგრა", - განაცხადა სასამართლო სხდომიდან გამოსულმა ირმა ჭკადუამ.
