ეს ყველაფერი მამა გიორგის გადასაწყვეტია, - ასე გამოეხმაურა "ჯი-ეიჩ-ენ"-თან საუბარში დეკანოზ გიორგი მამალაძის ადვოკატი მიხეილ რამიშვილი ნიკა გვარამიას განცხადებას, რომელმაც მამა გიორგის ადვოკატობა შესთავაზა.
მისი თქმით, დეკანოზის ადვოკატის პროფესიონალიზმის ეჭვქვეშ დაყენებას ვერავინ გაბედავს.
"ეს ჩემთვის არაფერს ცვლის და არც შეურაცხყოფად ვიღებ. ჩვენი პროფესიონალიზმის ეჭვქვეშ დაყენებას ვერავინ გაბედავს. ეს გვარამიას ნებაა და მას სრული უფლება აქვს თავისი პოზიცია და კეთილი ნება გამოხატოს. მის ამ სურვილს მამა გიორგის აუცილებლად გადავცემთ. ეს ყველაფერი მამა გიორგის გადასაწყვეტია. ეს არ ნიშნავს იმას რომ ჩვენ სუსტები ვართ. ნანა კაკაბაძე და სხვა პირები ასე გვიხსენიებენ და შეურაცხყოფებიც ისმის, მაგრამ ეს შეურაცხყოფები ყველას ბუმერანგივით დაუბრუნდება, ამის გარანტიას გაძლევთ", - განაცხადა რამიშვილმა.
ცნობისთვის, თუ დეკანოზი ნიკა გვარამიას შეთავაზებას დათანხმდება, ის მისი მე-7 ადვოკატი იქნება.
შეგახსენებთ, თბილისის საქალაქო სასამართლოს მოსამართლე ბესიკ ბუგიანიშვილმა დეკანოზი გიორგი მამალაძის საქმეზე გადაწყვეტილება გამოაცხადა.
სასამართლომ ის დამნაშავედ ცნო და 9 წლით თავისუფლების აღკვეთა მიუსაჯა. მოსამართლემ დეკანოზს ბრალდება დაუკვალიფიცირა - ანგარებით მკვლელობა მოუხსნა და მხოლოდ მკვლელობის მომზადებისთვის 9 წლიანი პატიმრობა შეუფარდა.
განაჩენის გამოცხადებას თავად ბრალდებული დეკანოზი არ ესწრებოდა.
ცნობისთვის, დეკანოზ გიორგი მამალაძეს პროკურატურა შორენა თეთრუაშვილის მკვლელობის მომზადებას ედავება. მას ბრალი თავდაპირველად მკვლელობის მომზადებისა და იარაღის უკანონო შეძენა-შენახვაში ედებოდა, თუმცა მოგვიანებით პროკურატურამ ბრალი დაუმძიმა და ანგარებით განზრახ მკვლელობის მომზადების მუხლით გადაუკვალიფიცირა.