შესაბამისი აუდიო ჩანაწერებიც არსებობს, ის [დეკანოზი გიორგი მამალაძე] ამ ჩანაწერში კონკრეტულ პირს ესაუბრება და ამბობს რომ მისი გერმანიაში გამგზავრება არავისთვის უნდა გამხდარიყო ცნობილი, - ამის შესახებ ე.წ. ციანიდის საქმის პროკურორმა ზვიად გუბელაძემ სასამართლოს სხდომის დასრულების შემდეგ ჟურნალისტებს განუცხადა.
მისი თქმით, გამოკვლელებით დადგინდა, რომ 2017 წლის 3 თებერვალს, საღამოს საათებში მეუფე დიმიტრისა და დეკანოზ მამალაძეს შორის სატელეფონო საუბარი შედგა, ეს საუბარი მხოლოდ და მხოლოდ პატრიარქის ჯანმრთელობის მდგომარებას შეეხებოდა, შესაბამისად განცხადებები, რომ მეუფე დიმიტრის მიპატიჟებით მიდიოდა დეკანოზი გერმანიაში, სიმართლეს არ შეესაბამება.
"გუშინდელი სიუჟეტით ითქვა, რომ თითქოს მეუფე დიმიტრის მიპატიჟებით მიდიოდა მამა გიორგი მამალაძე გერმანიაში. როგორც მოგეხსენებათ დავკითხეთ როგორც მეუფე დიმიტრი, ასევე გამოვიკვლიეთ ბრალდებულის მობილური ტელეფონის ამონაწერები და დადგინდა, რომ გიორგი მამალაძემ 2017 წლის 2 თებერვალს, მას შემდეგ რაც შორენა თეთრუაშვილი გერმანიაში გაემგზავრა, დეკანოზმა მიიღო გადაწყვეტილება გერმანიაში წასულიყო. 2017 წლის 3 თებერვალს, საღამოს საათებში მეუფე დიმიტრისა და დეკანოზ მამალაძეს შორის სატელეფონო საუბარი შედგა, ეს საუბარი მხოლოდ და მხოლოდ პატრიარქის ჯანმრთელობის მდგომარებას შეეხებოდა, შესაბამისად განცხადებები, რომ მეუფე დიმიტრის მიპატიჟებით მიდიოდა დეკანოზი გერმანიაში, სიმართლეს არ შეესაბამება. როცა დაცვის მხარე აპელირებს რომ მამალაძე გერმანიაში მეუფე დიმიტრის მიპატიჟებით მიდიოდა, რატომ არასდროს საუბრობენ იმაზე რომ გიორგი მამალაძე გერმანიაში გამგზავრების ფაქტს მალავდა. ამის შესაბამისი აუდიო ჩანაწერებიც არსებობს, ის ამ ჩანაწერში კონკრეტულ პირს ესაუბრება და ამბობს რომ მისი გერმანიაში გამგზავრება არავისთვის უნდა გამხდარიყო ცნობილი. თუ ის მართლა პატრიარქის მოსანახულებლად მიდიოდა, რატომ უნდა დამალულიყო საპატრიარქოს სხვა თანამშრომლებისთვის", - განაცხადა ზვიად გუბელაძემ.
შეგახსენებთ, თბილისის საქალაქო სასამართლოს მოსამართლე ბესიკ ბუგიანიშვილმა დეკანოზი გიორგი მამალაძის საქმეზე გადაწყვეტილება გამოაცხადა.
სასამართლომ ის დამნაშავედ ცნო და 9 წლით თავისუფლების აღკვეთა მიუსაჯა. მოსამართლემ დეკანოზს ბრალდება დაუკვალიფიცირა - ანგარებით მკვლელობა მოუხსნა და მხოლოდ მკვლელობის მომზადებისთვის 9 წლიანი პატიმრობა შეუფარდა.
განაჩენის გამოცხადებას თავად ბრალდებული დეკანოზი არ ესწრებოდა.
ცნობისთვის, დეკანოზ გიორგი მამალაძეს პროკურატურა შორენა თეთრუაშვილის მკვლელობის მომზადებას ედავება. მას ბრალი თავდაპირველად მკვლელობის მომზადებისა და იარაღის უკანონო შეძენა-შენახვაში ედებოდა, თუმცა მოგვიანებით პროკურატურამ ბრალი დაუმძიმა და ანგარებით განზრახ მკვლელობის მომზადების მუხლით გადაუკვალიფიცირა.