მას შემდეგ, რაც ჩაგვბარდება სარეზოლუცია-სამოტივაციო ნაწილი, ამის შემდგომ მივიღებთ გადაწყვეტილებას, გავასაჩივრებთ თუ არა თბილისის საქალაქო სასამართლოს გადაწყვეტილებას, - ამის შესახებ ე.წ. ციანიდის საქმის პროკურორმა ზვიად გუბელაძემ სასამართლოს სხდომის დასრულების შემდეგ ჟურნალისტებს განუცხადა.
მისი თქმით, ისინი მხოლოდ მოტივაციის ნაწილში გაასაჩივრებენ და არა ფაქტობრივ გარემოებებთან დაკავშირებით.
მისივე განცხადებით, სასამართლომ მიიჩნია რომ გიორგი მამალაძე მკვლელობას ნამდვილად ამზადებდა.
"თბილისის საქალაქო სასამართლომ სრულად გაიზიარა ბრალდების მხარის მტკიცებულებები და ფაქტობრივი გარემოებები მიიჩნია დადგენილად რომ გიორგი მამალაძე ნამდვილად ამზადებდა განზრახ ადამიანის მკვლელობა. მან მართლსაწინააღმდეგოდ შეიძინა და ინახავდა ცეცხლსასროლ იარაღს და საბრძოლო მასალას. რაც შეეხება მოტივაციას, ბრალდების მხარე ვამტკიცებდით რომ დღესაც გვჯერა, რომ მოტივაცია იყო ანგარება, თუმცა სასამართლომ სხვა გადაწყვეტილება მიიღო და განმარტა, რომ ეს იყო შურისძიების მოტივი. ჩვენ მიგვაჩნდა რომ გიორგი მამალაძემ შორენა თეთრუაშვილის მკვლელობა იმის გამო განიზრახა რომ შეენარჩუნებინა ის მატერიალური კეთილდღეობა, რაც გააჩნდა და კიდევ უფრო მაღალი კარიერული წინსვლისთვის მიეღწია", - განაცხადა გუბელაძემ.
შეგახსენებთ, თბილისის საქალაქო სასამართლოს მოსამართლე ბესიკ ბუგიანიშვილმა დეკანოზი გიორგი მამალაძის საქმეზე გადაწყვეტილება გამოაცხადა.
სასამართლომ ის დამნაშავედ ცნო და 9 წლით თავისუფლების აღკვეთა მიუსაჯა. მოსამართლემ დეკანოზს ბრალდება დაუკვალიფიცირა - ანგარებით მკვლელობა მოუხსნა და მხოლოდ მკვლელობის მომზადებისთვის 9 წლიანი პატიმრობა შეუფარდა.
განაჩენის გამოცხადებას თავად ბრალდებული დეკანოზი არ ესწრებოდა.
ცნობისთვის, დეკანოზ გიორგი მამალაძეს პროკურატურა შორენა თეთრუაშვილის მკვლელობის მომზადებას ედავება. მას ბრალი თავდაპირველად მკვლელობის მომზადებისა და იარაღის უკანონო შეძენა-შენახვაში ედებოდა, თუმცა მოგვიანებით პროკურატურამ ბრალი დაუმძიმა და ანგარებით განზრახ მკვლელობის მომზადების მუხლით გადაუკვალიფიცირა.