საგანგებო სიტუაციების მართვის სააგენტოს თბილისის მთავარი სამმართველოს უფროსის მოადგილის, დავით გელაშვილის განცხადებით, მთაწმინდაზე ხანძარი დღის ბოლომდე სრულად ლიკვიდირებული იქნება.
როგორც მან შემთხვევის ადგილზე ჟურნალისტებს განუცხადა, ამ მომენტისთვის ხანძარი ლოკალიზებულია, დარჩენილია ცალკეული კერების ჩაქრობითი სამუშაოები.
"შემთხვევის ადგილზე მობილიზებული იყო 10 ერთეული სახანძრო-სამაშველო ტექნიკა და ხანძრის ჩაქრობაში 50-ზე მეტი მეხანძრე-მაშველი იღებდა მონაწილეობას. რთული რელიეფის მიუხედავად, უმოკლეს ვადაში დაახლოებით 30-35 წუთში ხანძრის ლოკალიზება მოხდა. დამწვარ ფართობსა და ხანძრის გამომწვევ მიზეზებზე მოგვიანებით მოგახსენებთ. წინასწარი ინფორმაციით, ორი ჰექტარი დაიწვა. ქარის შემთხევაში ხანძრის გავრცელების საფრთხე არ არის. თავის დაზღვევის და ხანძრის დროულად ლიკვიდაციის მიზნით, ვერტმფრენმაც გადაიფრინა", - განაცხადა დავით გელაშვილმა.