ვენეციის კომისიის მდივანი ტომას მარკერტი ხელისუფლების მიერ გავრცელებულ იმ განცხადებას აფასებს რომლის მიხედვითაც საპარლამენტო უმრავლესობა საშემოდგომო სესიაზე საკონსტიტუციო ცვლილებებს დაამტკიცებს. მარკერტი ,,რუსთავი 2“ - თან საუბარში აცხადებს, რომ ვენეციის კომისია თავიანთ მოსაზრებას 6 ოქტომბერს გამოაქვეყნებს

“ვენეციის კომისია ამ მოლაპარაკების ნაწილი არ იყო. რაც საქართველოდან შევიტყვე არის ის რომ კონსენსუსი მიღწეული არ არის. მმართველი პარტიის დღევანდელი განცხადებაც ამას ადასტურებს. ჩვენთვის დასანანია, რომ ასეა. მხოლოდ ერთი კი არა, ყველა მხარე უნდა ყოფილიყო მოქნილი. ჩვენ ველით რომ მოგვმართავენ თხოვნით, შევაფასოთ მიღებული ტექსტი. ვენეციის კომისია საკუთარ მოსაზრებას 6 ოქტომბერს გამოაქვეყნებს. შესაძლოა ამას მოყვეს გარკვეული შეზღუდული ცვლილებები რომ ტექსტი გახდეს უფრო მოქნილი ოპოზიციისთვის. რამდენადაც ჩემთვის ცნობილია, მმართველი პარტია არ გამორიცხავს გარკვეული ცვლილებების შეტანას. ამისთვის ადგილი ყოველთვის უნდა არსებობდეს. რაც შეეხება მომავალ კვირას დაგეგმილ შეხვედრას, მას ასეთი მცირე კონსენსუსის პირობებში აზრი არ ექნება” - განაცხადა ტომას მარკერტმა.

საპარლამენტო უმრავლესობა საკონსტიტუციო რეფორმასთან დაკავშირებით სპეციალური განცხადება გაავრცელა, რომლის თანახმადაც, ისინი სტრასბურგში ოპოზიციასთან შეხვედრას არ აპირებენ,  საკონსტიტუციო ცვლილებები კისაშემოდგომო სესიაზე საბოლოოდ დამტკიცდება.

15 კვალიფიციური პარტიის გადაწყვეტილებით, მიუხედავად ჩიხში შესული მოლაპარაკებებისა, პარტიები 6 სექტემბერს ვენეციის კომისიას შეხვდებიან. ვენეციის კომისიის პრეზიდენტმა მხარეებს 6 სექტემბერს სტრასბურგში შეხვედრა შესთავაზა, სადაც ერთმანეთს მმართველი კოალიციისა და ოპოზიციური პარტიების წარმომადგენლები შეხვდებოდნენ.