გიორგი გიორგანაშვილის სასამართლო პროცესზე მტკიცებულებების გამოკვლევა დასრულდა.
როგორც გიორგანაშვილმა სხდომის შემდეგ "ჯი-ეიჩ-ენ"-ს განუცხადა, პოლიციელი და ორი გამომძებელი დაიკითხა. მისივე თქმით, მათ ყუილებით სავსე ჩვენება ჰქონდათ.
"ვითომ პოლიციელი და ორი გამომძიებელი დაიკითხა, ვინც საქმეს იძიებს. ტყუილებით სავსე ჩვენება ჰქონდათ, რაც პირველ დღეს აქვთ ჩვენებაში ნათქვამი და რაც დაუწერეს, იგივე ისაუბრეს, ახალი არაფერი. ისაუბრეს რომ რომელიღაც საათზე გამაჩერეს და აღმომიჩინეს ნარკოტიკული საშუალება", - აღნიშნა გიორგი გიორგანაშვილმა.
პროცესიდან გამოსულმა გიორგანაშვილის ადვოკატმა გიორგი მახარაძემ "ჯი-ეიჩ-ენ"-თან საუბრისას აღნიშნა, რომ ერთ-ერთი მოწმე პოლიციელი ცოტაცი აირია კიდეც ჩვენების მიცემისას. მისივე თქმით, პროკურორს სურდა რომ მოწმეს სხვა პასუხები გაეცა, მაგრამ მას სულ სხვა პასუხები გასცა.
"დღევანდელ მოწმეებთან დაკავშირებით დიდი მოლოდინი არ გვქონია. ჩვეულებრივი, სტანდარტული ჩვენება ჰქონდათ, დაზეპირებული ტექსტი. რამდენი პოლიციელიც დაიკითხა, ყველას იდენტური ჩვენება ჰქონდა. ხშირ შემთხვევაში კითხვებზე მათი პასუხი ასეთია, რომ ვერ იხსენებენ. ერთ-ერთი მოწმე პოლიციელი ცოტაცი აირია კიდეც ჩვენების მიცემისას. პროკურორს სურდა რომ მოწმეს სხვა პასუხები გაეცა, მაგრამ მას სულ სხვა პასუხები გასცა", - დასძინა ადვოკატმა.
ცნობისთვის, შემდეგი სასამართლო სხდომა 6 ოქტომბერს გაიმართება. ამ დღეს ბრალდების მხარე თავის დასკვნით სიტყვას იტყვის, შემდეგ კი დაცვის მხარე.
