"ნაციონალური მოძრაობის" წარმომადგენელი ზაზა ბიბილაშვილი საპარლამენტო უმრავლესობის მიერ საკონსტიტუციო რეფორმასთან დაკავშირებით გავრცელებულ განცხადებას ეხმიანება და აცხადებს, ხელისუფლება საერთაშორისო თანამეგობრობას ატყუებს.
მისი თქმით, პროექტი, რომელიც "ქართულმა ოცნებამ" ვენეციის კომისიას წარუდგინა, იყო განსხვავებული იმ პროექტისგან, რომელსაც ახლა "ოცნება" თავს ახვევს ქართულ სახელმწიფოს და საზოგადოებას.
"მათ მოიტყუეს, როდესაც განაცხადეს, რომ 2020 წლიდან აპირებდნენ პროპორციულ სისტემაზე გადასვლას. ამ შემთხვევაში სრული კონსენსუსი არსებობს საქართველოში და ქვეყნის ფარგლებს გარეთაც იმასთან დაკავშირებით, რომ ეს კონსტიტუცია იქნება უზარმაზარი უკან გადადგმული ნაბიჯი დემოკრატიის გზაზე. რაც მთავარია, იქნება დაკანონება იმ მაფიოზურ-კლანური რეჟიმისა, რომელიც ახლა საქართველოშია გამეფებული. ეს კონსტიტუცია შეუძლებელს გახდის საქართველოში დემოკრატიული არჩევნების გზით ხელისუფლების შეცვლას",-აღნიშნა ბიბილაშვილმა.
დღეს გავრცელებული განცხადების თანახმად, საპარლამენტო უმრავლესობა სტრასბურგში ოპოზიციასთან შეხვედრას არ აპირებს, საკონსტიტუციო ცვლილებები კი საშემოდგომო სესიაზე საბოლოოდ დამტკიცდება.
