რამდენიმე წუთში თბილისის საქალაქო სასამართლოში ე.წ. ციანიდის საქმის განხილვა დაიწყება.
როგორც საქმის პროკურორმა ზვიად გუბელაძემ "ჯი-ეიჩ-ენ"-ს განუცხადა, მოსამართლისთვის მათ დასკვნით სიტყვაში რაიმე ახალი არ იქნება. მისივე თქმით, მას აქვს მოლოდინი, რომ გამამტყუნებელი განაჩენი დადგება.
"მტკიცებულებების გამოკვლევა უკვე დასრულდა. წინა სასამართლო სხდომაზე დასკვნითი სიტყვა ვთქვით, სადაც შევაჯამეთ ჩვენს მიერ წარდგენილი ყველა მტკიცებულება. როგორც მოგეხსენებათ, 100-ზე მეტი მოწმე დავკითხეთ, წარვადგინეთ მტკიცებულებები, მათ შორის აუდიო-ვიდეო ჩანაწერები, რომელიც გიორგი მამალაძის ბრალეულობას ადატურებს. გვაქვს გონივრული მოლოდინი და იმედი, რომ გიორგი მამალაძის მიმართ გამამტყუნებელი განაჩენი დადგება. რაც შეეხება დღევანდელს სასამართლო პროცესს, დაცვის მხარე იტყვის დასკვნით სიტყვას და დიდი მოლოდინი დაცვის ამ სიტყვასთან არ გვაქვს. როგორც ყველასთვის ცნობილია, მათ ჰყავთ ერთადერთი მოწმე, ირაკლი ფირცხალავა დაკითხეს, შესაბამისად, მათი დასკვნითი სიტყვა მათ მოსაზრებებზე იქნება დაყრდნობილი. მოსამართლისთვის მათ დასკვნით სიტყვაში რაიმე ახალი არ იქნება. ჩვენ ამ დასვკნით სიტყვის შემდეგად გვაქვს მოლოდინი, რომ გამამტყუნებელი განაჩენი დადგება", - განაცხადა საქმის პროკურორმა ზვიად გუბელაძემ.
