საბედნიეროდ, ოთხივეს მდგომარეობა მსუბუქია, არც ერთს აღენიშნება მძიმე დაზიანება, - ამის შესახებ ჯანდაცვის მინისტრმა დავით სერგეენკომ ღუდუშაურის კლინიკაში განაცხადა, სადაც ბორჯომში დაშავებული ეკიპაჟის წევრები მოათავსეს.
,,პირველი რიგის კვლევები უკვე ჩატარებულია. წინასწარი შეფასებით, მდგომარეობა მსუბუქია. მოხდა ვერტმფრენის ავარიული დაჯდომა. სამი ეკიპაჟის წევრია, ერთი მაშველი. მათ ჯანმრთელობას და სიცოცხლეს საფრთხე არ ემუქრება.
სულ ცოტა ხანში, უფრო დეტალური ინფორმაცია გვექნება კვლევებზე, რათა ყველაფერი გამოვრიცხოთ. ოთხივე მათგანი კონტაქტურია და ადეკვატური. როგორც წესი, ასეთი დაზიანების დროს პაციენტები რამდენიმე საათის განმავლობაშ რჩებიან სამედიცინო დაწესებულებაში. მფრინავების პროფესიონალიზმმა იხსნა მათი სიცოცხლე, მათ მოახერხეს წყალზე მომხდარიყო ავარიული დაჯდომა“, - განაცხადა მინისტრმა.
ბორჯომის ხეობაში, სოფელ დაბას მიმდებარე ტერიტორიის პრევენციული დამუშავებისას, მდინარე გუჯარულაზე მოწყობილი ხელოვნური ავზიდან წყლის აღების დროს, საქართველოს შინაგან საქმეთა სამინისტროს სასაზღვრო პოლიციის კუთვნილმა ვერტმფრენმა - „მი-8“-მ ავარიული დაჯდომა განახორციელა.
