სამართალდამცავების მიერ თბილისის საკრებულოს წევრის, ზურაბ ნეფარიძის დაკავებას საკრებულოს ფრაქცია „ნაციონალური მოძრაობის“ წევრი, ირაკლი ნადირაძე გამოეხმაურა.
„აღნიშნული პიროვნება, წინა ხელისუფლების დროს, სწორედაც თანხის გამოძალვაზე იყო დაკავებული, მაგრამ „ქართულმა ოცნებამ“ 2012 წლის არჩევნების შემდეგ, ციხიდან როგორც პოლიტპატიმარი, როგორც მართალი ადამიანი, ისე გამოუშვა და ახლა თვითონვე დააკავეს ქრთამის აღების ფაქტზე“, - განაცხადა „ჯი-ეიჩ-ენ-თან“ ირაკლი ნადირაძემ.
ის არ გამორიცხავს, ეს დაკავება მოახლოებულ თითმმართველობის არჩევნებს უკავშირდებოდეს.
„წინასწარ დეტალებზე საუბარი არ მინდა, იმედია გამოძიება გვეტყვის რასთან გვაქვს საქმე, თუმცა, წინასაარჩევნოდ, ბიძინა ივანიშვილის თავში რა მოიხარშება, კაცმა არ იცის. მისგან და „ქართული ოცნებისგან“ გამორიცხული არაფერია“, - აცხადებს ნადირაძე.
მან „ჯი-ეიჩ-ენ-თან“ სუს-ის ანტიკორუფციული სააგენტოს მუშაობაზეც ისაუბრა. როგორც საკრებულოს წევრი აცხადებს, აღნიშნულ სააგენტოში მხოლოდ ცალკეულ დაკვეთებს ასრულებენ.
„მხოლოდ დაბალი რანგის ადამიანების დაკავება ხდება, რომლებიც ქრთამს იღებენ, თუმცა, მაღალჩინოსნების საქმეზე, რომელთაც ჩვენ მილონობით ლარის მოპარვაში ვამხელთ, არც ანტკორიფციული სამსახური, არც კონტროლის პალატა და არც პროკურატურა ახდენს რეაგირებას. ცალსახად შეგვიძლია ვთქვათ, რომ ეს ადამიანები მხოლოდ ცალკეულ დაკვეთებს ასრულებენ და სინამდვილეში არანაირი საერთო აქვთ კორუფციასთან ბრძოლაში.
თუ ბიძინა ივანიშვილის კლანის წევრი ხარ, ხელშეუხებელი ხარ. მოსახლეობისთვის თვალებში ნაცრის შესაყრელად, ასე შიგადაშიგ, რიგით ქვეშევრდრომებს დააკავებენ, ვითომ კორუფციას ებრძვიან. არადა, ქვეყანაში კლანური კორუფცია ჰყვავის“, - განაცხადა ნადირაძემ.