ჩემთვის ნამდვილად შოკისმომგვრელი ფაქტია, წარმოუდგენელია ამხელა გამოცდილების მქონე კაცმა ასეთი შეცდომა დაუშვას, - ასე აფასებს "ჯი-ეიჩ-ენ"-თან საუბარში თბილისის მუნიციპალიტეტის საკრებულოს ფრაქციის ''ქართული ოცნება-ეროვნული ფორუმი'' თავმჯდომარე ავთანდილ დავითაძე მისი კოლეგის, ზურაბ ნეფარიძის დაკავებას.
როგორც დავითაძემ აღნიშნა, დაკავებული ზურაბ ნეფარიძე პარტიის რიგებიდან იყო გარიცხული, თუმცა, მისივე თქმით, გამომდინარე იქედან, რომ მასთან კოლეგიალობა ჰქონდათ დარღვეული, ის ფრაქციაში დატოვეს.
"ზურაბ ნეფარიძე პარტიის რიგებიდან იყო გარიცხული, პარტიის წევრი იყო წლების განმავლობაში, მაგრამ მას ჰქონდა შეუთავსებლობა, როგორც თავის ორგანიზაციაში, ასევე პოლიტიკური საბჭოს გადაწყვეტილებებთან, აქედან გამომდინარე პარტიამ მიიღო გადაწყვეტილება, რომ პარტიიდან გარიცხულიყო, მაგრამ გამომდინარე იქედან, რომ მასთან ამდენი წლის ურთიერთობა გვქონდა, იყო წარმატებული მაჟორიტარი დეპუტატი ერთ-ერთ ოლქში და მასთან კოლეგიალობა დარღვეული დარღვეული, მან მოგვმართა თხოვნით რომ დარჩენილიყო ფრაქციის რიგებში, რა თქმა უნდა, ფრაქციის სხდომაზე განვიხილეთ აღნიშნული საკითხი და ფრაქციამ ერთხმად დაუჭირა მხარი, რომ ის დარჩენილიყო ჩვენს რიგებში", - განუცხადა "ჯი-ეიჩ-ენ"-ს დავითაძემ, რომელმაც აქვე აღნიშნა, რომ გასულ წლებში, როდესაც ზურაბ ნეფარიძე ამავე ბრალდებით დააკავეს, საქმე შეთითხნილი იყო და სწორედ იმიტომ რომ მისი დაკავება უსაფუძვლოდ მოხდა, მას პოლიტპატიმრის სტატუსი მიანიჭეს.