დღეს რამდენიმე საათის განმავლობაში სამართალდამცავებს დეტალურ ინფორმაციას აწვდიდა ჯომარდობის ფედერაციის პრეზიდენტი, დავით ქაცარავა გუშინ, ხანძრის ადგილზე მის მიერ აღმოჩენილ საეჭვო ნივთიერებასთან დაკავშირებით.
„სოფელ დაბის მიმდებარე ტერიტორიაზე, მოხალისეებს მთის ერთი ფერდობი გვქონდა ჩაბარებული, მეხანძრეებს კი, მეორე ფერდობი. სწორედ იქ, საკმაოდ რთულად მისადგომ ადგილზე, ფაქტობრივად ხანძრის ეპიცენტრში, ბოთლის ნამსხვრევები აღმოვაჩინე. იმ ადგილზე მარტო მე ვიყავი, შორი-ახლოს, იმყოფებოდა ბესო ჩუბინიძე, თუმცა, ბოთლი მე აღმოვაჩინე. ის მთლიანად იყო დამსხვრეული და გაურკვეველი წარმომავლობის, ნავთობპროდუქტებთან მიმსგავსებული სუნი ჰქონდა.ვიმეორებ, ეს ნამსხვრევები ხანძრის ეპიცენტრში იყო. თან, ეს ადგილი გუშინდელი ცეცხლის ახალი კერა იყო“, - აცხადებს „ჯი-ეიჩ-ენ-თან“ საუბარში ბორჯომის პოლიციის შენობიდან გამოსული დავით ქაცარავა.
ვერსიას, რომ შესაძლოა, ბოთლის ნამსხვრევები საქეიფოდ მისულ ტურისტებს დარჩენოდათ, ქაცარავა გამორიცხავს.
„იმდენად რთულად მისადგომი ადგილია, ეს ვერსია, რომ ვინმე იქ საქეიფოდ იყო ასული, დალია და ეს ერთი ბოთლი დატოვა, ნაკლებად სავარაუდოა. მიმდებარე ტერიტორია 500 მეტრის რადიუსში დავათვალიერეთ, იქნებ საკვების ნარჩენები გვეპოვნა. ბუნებრივია, მსგავსი ვერაფერი ვნახეთ.
აღმოჩენილი ნივთი პოლიციის განყოფილებაში მე თვითონ ჩავიტანე. ნარჩენები შევკრიბე, პოლიეთილენის პარკში ჩავალაგე და ბორჯომში, პოლიციელებს ჩავუტანე, რადგან საშიშროება იყო, იმ ადგილზე ცეცხლი კვლავ გაჩენილიყო და ეს ნივთმტკციება განადგურებულიყო“, - აცხადებს ქაცარავა.
ის დარწმუნებულია, რომ ხანძარი შემთხვევით არ გაჩენილა და საქმე დივერსიასთან გვაქვს.
„მიუხედავად იმისა, რას დაასკვნის ექპსერტიზა და იქნება თუ არა აღმოჩენილი ბოთლი ამ ხანძართან კავშირში, ჩემი სუბიექტური აზრით, რაც ხდება, ეს არის ერთიანი, სერიოზული დივერსია. არ მჯერა, რომ ერთი კვირის განმავლობაში ამდენ რეგიონში ხანძარი შემთხვევით ჩნდება“, - განაცხადა დავით ქაცარავამ.