პრეზიდენტის პოლიტიკური მრჩეველი „ქართული ოცნების“ განცხადებას ეხმიანება. ფიქრია ჩიხრაძის განცხადებით, მმართველ ძალას პრეზიდენტის სახით მტრის ხატის შექმნა სჭირდება.
„რთულია ამ დამოკიდებულების ახსნა, იმიტომ რომ ჩვენ ამ ხნის განმავლობაში პრეზიდენტის ნებისმიერ ინიციატივასა და მოსაზრებაზე ვაწყდებით ყოველთვის აგრესიულ დამოკიდებულებას მმართველი ძალის წარმომადგენელთა მხრიდან. ეს ერთი მხრივ, შეიძლება აიხსნას აკვიატებული დამოკიდებულებით პრეზიდენტ მარგველაშვილის მიმართ, რომელიც არ არის ერთი პოლიტიკური ძალის პრეზიდენტი და მეორე, როგორც ჩანს მმართველ ძალას ქვეყანაში არსებული ვითარების ფონზე სჭირდება მტრის ხატის შექმნა“, - აცხადებს ჩიხრაძე.
,,ქართული ოცნება“ მოუწოდებს ყველას, არ უპასუხონ პრეზიდენტის შეურაცხმყოფელ განცხადებებს
„გუშინ გიორგი მარგველაშვილმა მორიგი შეურაცხყოფა მიაყენა მმართველი პარტიის ლიდერებს. კიდევ ერთხელ მოვუწოდებთ ყველას, არ აყვნენ მას და არ უპასუხონ მის შეურაცხმყოფელ განცხადებებს“, - აღნიშნულია ,,ქართული ოცნების” მიერ გავრცელებულ განცხადებაში, სადაც არ კონკრეტდება, პრეზიდენტის რომელ გამონათქვამს გულისხმობს მმართველი გუნდი.