ხელისუფლებისგან არავითარი მზაობა არ ჩანს და ის ჩიხშია, მაგრამ სამწუხაროდ, პარტიები გამოჩნდნენ, რომლებიც მზად არიან, ხელისუფლებას უპირობოდ ესაუბრონ, რაც პირდაპირ თანამშრომლობასა და კონსენსუსის გარეშე კონსტიტუციის მიღების მცდელობას ნიშნავს, - ამის შესახებ ჟურნალისტებს „რესპუბლიკური პარტიის“ თავმჯდომარემ, ხათუნა სამნიძემ განუცხადა, რომელიც 6 სექტემბერს, სტრასბურგში ჩანიშნულ შეხვედრას გამოეხმაურა.
მისი ინფორმაციით, სტრასბურგში ორი პარალელური წერილი გაიგზავნა, რომელთაგან ერთ-ერთს ხელს 15 პოლიტიკური პარტია წერს, ხოლო მეორეს 9.
"15 პარტიის მიერ გაგზავნილ წერილში მოთხოვნილია, რომ პროპორციული სისტემა პრინციპული საკითხია, რის შემდეგაც მოლაპარაკებების მაგიდასთან დავსხდებით. ამის შემდეგ, ხელისუფლების პასუხები არანაირ შთაბეჭდილებას არ ტოვებს, რომ ისინი მოლაპარაკებებისთვის და კონსენსუსისთვის მზად არიან. პარალელურად, სამწუხაროდ, სტრასბურგში ცხრა პარტიის მიერ ხელმოწერილი დოკუმენტი გაიგზავნა, რის შემდეგაც ვენეციის კომისიის მხრიდან, 6 სექტემბერს შეხვედრისთვის მზაობა დადასტურდა. რაც ხელისუფლებიდან ისმის, ისაა, რომ მზად არის, მოლაპარაკებების მაგიდასთან დაჯდეს და ოპოზიციას არგუმენტებით ესაუბროს, თუ რატომ აქვს ასეთი შეხედულებები საკონსტიტუციო რეფორმაზე“, - განაცხადა სამნიძემ.
