ირაკლი მამალაძე არც ოფიციალურად და არც არაოფიციალურად სახელმწიფო უსაფრთხოების სამსახურის თანამშრომელი არ ყოფილა, - ამის შესახებ ჟურნალისტებს სასამართლო დარბაზიდან გამოსულმა პროკურორმა ზვიად გებულაძემ განუცხადა.
მისი თქმით, თბილისის პროკურატურაში მიმდინარეობს გამოძიება ირაკლი ფირცხალავას საჯაროდ გაკეთებულ განცხადებასთან დაკავშირებით, რომ თითქოსდა ირაკლი მამალაძე არის აგენტი და საიდუმლო თანამშრომელი სახელმწიფო უსაფრთხოების სამსახურის. მისივე თქმით, ფირცხალავა მის მიერ გაკეთებული საჯარო განცხადებებით ცდილობდა საზოგადოების შეცდომაში შეყვანას.
"დღევანდელ სასამართლო პროცესზე დავაყენეთ შუამდგომლობა ახალი მტკიცებულების წარდგენასთან დაკავშირებით, რაც მოსამართლის მიმართ დაკმაყოფილებულ იქნა. მოგეხსენებათ, თბილისის პროკურატურაში მიმდინარეობს გამოძიება ირაკლი ფირცხალავას საჯაროდ გაკეთებულ განცხადებასთან დაკავშირებით, რომ თითქოსდა ირაკლი მამალაძე არის აგენტი და საიდუმლო თანამშრომელი სახელმწიფო უსაფრთხოების სამსახურის. აღნიშნული გამოძიების ფარგლებში დადასტურდა, რომ ირაკლი ფირცხალავა ცრუ განცხადებებს აკეთებდა და მის მიერ გაკეთებული განცხადებები სიმართლეს არ შეესაბამება. აღნიშნული დადასტურებული იქნა გამოძიების შედეგებით, შესაბამისად, გამოძიების შედეგები დღევანდელ სასამართლო პროცესზე წარვადგინეთ, რითიც დასტურდება, რომ ირაკლი ფირცხალავა ცრუ განცხადებებს აკეთებდა. ის მის მიერ გაკეთებული საჯარო განცხადებებით ცდილობდა საზოგადოების შეცდომაში შეყვანას. შესაბამისად, დღევანდელ პროცესზე მასთან გვექნება კითხვები, თუ რატომ აკეთებდა ასეთ ცრუ განცხადებებს და რას ემსახურებოდა მისი მხრიდან ჩვენი ასეთი მთავარი მოწმის დისკრედიტაცია", - აღნიშნა პროკურორმა.
რაც შეეხება იმას, თუ რითი დადასტურდა ის ფაქტი, რომ ირაკლი მამალაძე სახელმწიფო უსაფრთხოების საიდუმლო თანამშრომელი არ არის, პროკურორს ასეთი პასუხი აქვს:
"ეს დადგენილ იქნა გამოძიების ფარგლებში გამოთხოვილი, შესაბამისი დოკუმენტები, სადაც ცალსახად საუბარია, რომ ირაკლი მამალაძე არც ახლა და არც წარსულში, არასდროს ყოფილა სახელმწიფო უსაფრთხოების სამსახურის საიდუმლო თანამშრომელი. ის არც ოფიციალურად და არც არაოფიციალურად, არ ყოფილა საიდუმლო თანამშრომელი", - აღნიშნა პროკურორმა.
