თუ მიხეილ სააკაშვილი აშშ-ში დაიდებს ბინას, ჩვენ გვექნება ამ ქვეყანასთან სამართლებრივი კონსულტაცია და შეთანხმება მის გადმოცემასთან დაკავშირებით, - ეს განცხადება საქართველოს იუსტიციის მინისტრმა თეა წულუკიანმა მიხეილ სააკაშვილის ექსტრადიციასთან დაკავშირებით გააკეთა.
წულუკიანის განმარტებით, საქართველო სამართლებრივ ნაბიჯებს იმის მიხედვით გადადგამს, თუ სად აირჩევს მიხეილ სააკაშვილი მუდმივ სამყოფელს,.
„თუ იქნება უკრაინა, სადაც ის ამბობს, რომ დაბრუნდება, ამ მხრივ, პრინციპში პროცედურები ამოწურული გვაქვს. ყველა ის მტკიცებულება, რაც ხელთ გვქონდა, ჯერ კიდევ 2014-2015 წლებში არის გადაგზავნილი. ასე რომ, თუ უკრაინაში გაჩნდა პოლიტიკური ნება, რომ საქართველოსთან ითანამშრომლოს, მათ შეუძლიათ მიიღონ გადაწყვეტილება ბრალდებულის გადმოცემასთან დაკავშირებით. რაც შეეხება სხვა სახელმწიფოებს, მაგალითად, ამერიკის შეერთებულ შტატებს, თუკი ყოფილი პრეზიდენტი იქ დაიდებს ბინას, ჩვენ დაგვჭირდება ამ ქვეყნებთან სამართლებრივი კონსულტაციები, მათ შორის, მოლაპარაკებები და შეთანხმებები გადმოცემის შესახებ“, - განაცხადა თეა წულუკიანმა.
ცნობისათვის, პროკურატურამ 2015 წლის შემდეგ უკრაინისგან მიხეილ სააკაშვილის გადმოცემა უკვე ორჯერ მოითხოვა. იმის გამო რომ კანონმდებლობით უკრაინას მისი მოქალაქის სხვა სახელწმიფოსთვის გადაცემის უფლება არ აქვს პროკურატურის ორივე მოთხოვნა უშედეგო დარჩა.
26 ივლისს კი უკრაინამ მიხეილ სააკაშვილს მოქალაქეობა ჩამოართვა, რისი ოფიციალური საბაბიც სააკაშვილის მიერ მოქალაქეობის მიღებისას ინფორმაციის დამალვა გახდა. უკრაინული მხარის ინფორმაციით სააკაშვილმა ანკეტაში არ მიუთითა რომ მასზე საქართველოში მასზე საქმეები იყო აღძრული. ამჟამად სააკაშვილი აშშ-ში იმყოფება. სააკაშვილი ახლა აცხადებს, რომ მას არანაირი ინფორმაცია არ დაუმალავს და სინამდვილეში ანკეტაზე მისი ხელმოწერა გააყალბეს.